Սարի թաղում 2016թ. հուլիսի 29-ին զանգվածային անկարգություններ հրահրելու մեջ մեղադրվող Անդրիաս Ղուկասյանի գործով նիստին, այսօր` նոյեմբերի 14-ին, Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում ցուցմունք տվեց քաղաքացի Արտակ Մկրտչյանը: Նախկինում դատապարտված է եղել գողության համար: Նա նշեց, որ աշխատում է որպես բանվոր, կուսակցական պատկանելիություն չունի, անցած տարվա ցույցերին էլ մասնակցել է «հետաքրքրության» համար: Անցած տարվա հուլիսի 29-ին էլ Ազատության հրապարակումէ եղել, ելույթ է ունեցել Արմեն Մարտիրոսյանը, Անդրիաս Ղուկասյանը: Վկայի պնդմամբ, Անդրիաս Ղուկասյանը Ազատության հրապարակում մոտեցել է մի քանի հոգու, որոնց մեջ եղել է նաեւ ինքը ու ասել` «Քարերը հավաքեք, հասնենք մեր «Սասնա ծռերին»»:
«Ազատության հրապարակում կանգնած էի, ելույթ էին ունենում: Արմեն Մարտիրոսյանն էր ելույթ ունենում, տրիբունայում կանգնած Անդրիաս Ղուկասյանն էլ էր ելույթ ունենում: Ելույթից հետո ինքը իջավ, մենք 10-15 հոգով կանգնած էինք, ասաց` տղերք ջան քարեր հավաքենք, հասնենք մեր Սասնա ծռերին: Երթով շարժվեցինք, հասանք Նարդոս, թեքվեցին Սարի թաղ, ես էլ չգնացի, ես Խորենացի գնացի: Ավելորդ գլխացավանք էր, որ գնայի մեկին պիտի վնաս տայի, խի վնաս տայի»,-ասաց նա:
Վկան նաեւ նշեց, որ հաշվառված է հոգեբուժարանում, նախկինում նաեւ ալկոհոլային խմիչքներ է օգտագործել, սակայն, բուժում չի ստացել:
Վկան պաշտպանական կողմի գրեթե բոլոր հարցերին պատասխանում էր, որ չի հիշում: Նա նաեւ նշեց, որ չի հիշում, թե անցած տարվա հուլիսի 29-ին Ազատության հրապարակում որտեղ է կանգնած եղել:
Ըստ մեղադրանքի՝ Անդրիաս Ղուկասյանը 2016 թվականի հուլիսի 29-ին Երեւանում զանգվածային անկարգություններ է կազմակերպել, ինչպես նաեւ փորձել է միանալ 2016 թվականի հուլիսի 17-ին Երեւանի Խորենացի փողոցի 158 հասցեում տեղակայված՝ Հայաստանի ոստիկանության Երեւանի վարչության պարեկապահակային ծառայության գնդի տարածքում գտնվող շենքերը, շինությունները եւ տրանսպորտային միջոցները զավթած, ոստիկաններ եւ բուժաշխատակիցներ պատանդ վերցրած կազմակերպված, զինված խմբին, զինվել, ապօրինի կերպով հրազեն ու ռազմամթերք կրել, պահել եւ խմբի անդամների հետ համակատարմամբ շարունակել պահել զավթածն ու պատանդներին, սակայն հանցագործություններն ավարտին չի հասցրել իր կամքից անկախ հանգամանքներով: Անդրիաս Ղուկասյանը կալանքի տակ է:
