Լիբանանի վարչապետ Սաադ Հարիրին կարող է տրոյական ձիու դեր խաղալ: Նոյեմբերի 16-ին լրագրողների հետ հանդիպման ժամանակ այսպիսի կարծիք հայտնեց արտակարգ եւ լիազոր դեսպան, փորձագետ Արման Նավասարդյանը՝ մեկնաբանելով Լիբանանի շուրջ ստեղծված իրավիճակը:
Նրա խոսքով՝ Հարիրիի վերադարձը Լիբանան կարող է բավականին ծանր հետեւանքների հանգեցնել: «Մեծ վտանգ կա Լիբանանում, որը դանդաղ գործող ռումբ է հանդիսանում»,- ասաց Նավասարդյանը՝ հավելելով, որ հիմնական վտանգը գալիս է «Հիզբոլլահից», որը ցանկացած պահի կարող է երկրում արյունահեղություն կազմակերպել:
Բացի այդ, փորձագետը նշեց, որ Լիբանանում հանգրվան են գտել շուրջ 1,5 միլիոն սիրիացի փախստականներ՝ չհաշված Պաղեստինի փախստականների երկու ճամբարները, որոնք նույնպես վտանգ են ներկայացնում, եւ կարող են արտաքին տարբեր ուժերի կողմից օգտագործվել՝ երկրում անկայունություն ստեղծելու համար:
«Բոլոր այդ ուժերը, որոնք դրսից են, կարող են Լիբանանն ամբողջությամբ ոչնչացնել», - ընդգծեց փորձագետն ու հավելեց, որ եթե դա տեղի ունենա, ապա կհանգեցնի շատ ավելի լուրջ հետեւանքների՝ նույնիսկ համեմատած Սիրիայի իրադարձությունների հետ: