«Ալ-Մուստակբալ» հասարակական-քաղաքական շարժման առաջնորդ, Լիբանանի նախկին վարչապետ Սաադ Հարիրին կիրակի օրը հայտարարել է, որ չի պատրաստվում վերադառնալ վարչապետի պաշտոնին, հայտնում է ՏԱՍՍ-ը:
«Ես միանշանակ չեմ պատրաստվում կրկին վարչապետ դառնալ: Բացի այդ, ես այլեւս ոչ մեկին չեմ առաջադրի այս պաշտոնի համար»,- ասել է նա Asharq Al-Awsat համաարաբական թերթին:
Շաբաթ օրը Մուստաֆա Ադիբը, ով վարչապետ էր նշանակվել օգոստոսի 31-ին, հայտարարել էր իր հրաժարականի եւ կառավարության կազմավորման լիազորությունները վայր դնելու մասին: Նա առաջադրվել է սուննի համայնքի շահերը արտահայտող «Ալ-Մուստակբալ» շարժման կողմից, որն այժմ ընդդիմություն է: Ինչպես նշում է Asharq Al-Awsat-ը, Ադիբի հեռանալու պատճառը խորհրդարանական դաշինքների ճնշումն է, որը խիստ պայմաններ էր դնում կաբինետի կազմի համար: Մինչդեռ Ադիբը պնդում էր, որ պետք է ստեղծվի 14 անկախ փորձագետների կառավարություն, որոնք կապ չունեն քաղաքական կուսակցությունների հետ:
Համաձայն ճգնաժամի հաղթահարման «ճանապարհային քարտեզի», որը սեպտեմբերի սկզբին մշակվել էր Ֆրանսիայի նախագահ Էմանուել Մակրոնի կողմից եւ հաստատվել Լիբանանի բոլոր ղեկավարների կողմից, հանրապետության կառավարությունը՝ վարչապետ Ադիբի գլխավորությամբ, պետք է ստեղծվեր մինչեւ սեպտեմբերի կեսը: Սակայն «Ամալ» եւ «Հըզբոլլահ» շիական կուսակցությունները հրաժարվել են նախարարական պաշտոնների ռոտացիայի սկզբունքից եւ պահանջել են, որ նրանք պահպանեն վերահսկողությունը ֆինանսական վարչության նկատմամբ: Այս մասին նրանք հայտարարել էին այն բանից հետո, երբ ԱՄՆ-ը սեպտեմբերի 8-ին պատժամիջոցներ էր կիրառել նախկին ֆինանսների նախարար Ալի Հասան Խալիլի դեմ, որին Վաշինգտոնը մեղադրում է «Հըզբոլլահին» օգնելու մեջ:
Սեպտեմբերի 22-ին Հարիրին առաջարկել էր, որ վարչապետ Ադիբը փոխզիջման գնա եւ ֆինանսների նախարարի պաշտոնը փոխանցի շիա անկախ քաղաքական գործչին, բայց այս նախաձեռնությունը հաջողություն չէր ունեցել: Լիբանանի նախագահ Միշել Աունը չորեքշաբթի օրը նախատեսում է խորհրդակցություններ նշանակել խորհրդարանական խմբակցությունների հետ՝ վարչապետի պաշտոնում նոր թեկնածու առաջադրելու վերաբերյալ: