Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով ամբաստանյալ Վարազդատ Սաֆարյանի եւ նրա շահերի պաշտպան Ազատ Շահբազյանի նկատմամբ դատարանը նախազգուշացման տեսքով դատական սանկցիա է կիրառել: Բանն այն է, որ պաշտպանն ու ազատության մեջ գտնվող ամբաստանյալը նոյեմբերի 20-ին տեղի ունեցած դատական նիստին մեկ ժամ ուշացումով են ներկայացել: Դատավոր Դավիթ Հարությունյանի հարցին՝ ինչու են ուշացել, նրանք պատասխանել են, թե նիստն սկսելու ժամը սխալ են իմացել, դատարանն այդ պատճառաբանությունը ոչ հիմնավոր է համարել եւ դատական սանկցիա կիրառել նրանց նկատմամբ:
Նախազգուշացման տեսքով դատական սանկցիա է կիրառվել նաեւ ամբաստանյալներից Գնել Թեւոսյանի շահերի պաշտպան Արա Զաքարյանի նկատմամբ՝ նիստից բացակայելու պատճառաբանությամբ:
Նիստը նախագահող դատավորը կողմերին նախազգուշացրել է անտեղի նիստերից չբացակայել եւ նիստերի հետաձգման համար հիմքեր չստեղծել:
Այս գործով վկաների հարցաքննության փուլն է, կուրսանտ Հայկազ Բարսեղյանի սպանության գործով կա դատակոչված 30 վկա, որոնցից 6-ը դատարանում դեռ ցուցմունք չի տվել: Նրանցից հինգը զինծառայող են, իսկ մեկը՝ Սամվել Սերոբյանը, զորացրվել է եւ այս պահին արտերկրում է:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում:
