2018 թվականին ՌԴ կապի եւ տեղեկատվական տեխնոլոգիաների վերահսկիչ ծառայությունը կստուգի՝ արդյոք Facebook սոցիալական ցանցը համապատասխանում է օրենսդրությանը: Այդ մասին հայտարարել է ծառայության ղեկավար Ալեքսանդր Ժարովը, հաղորդում է «ՌԻԱ Նովոստին»:
Նա ավելացրել է, որ «վերահսկողական գործողություններ» «ցանկացած դեպքում» տեղի կունենան՝ չնայած ընկերության ներկայացուցիչների հետ հանդիպմանը: Նրանք մտադիր են դեկտեմբերի վերջին կամ հաջորդ տարվա հունվարի սկզբին Ռուսաստան գալ:
«Օրը դեռ չի սահմանվել, բայց մենք տրամադրված ենք շուտ հանդիպել», - Մոսկվայում կայացած «Ռադիոն՝ գլոբալ մեդիա մրցակցությունում» միջազգային համաժողովում ասել է Ժարովը:
Սեպտեմբերին Ժարովը զգուշացրել էր, որ Facebook-ը Ռուսաստանում կփակվի, եթե ընկերությունը անձնական տվյալների պահպանության մասին օրենքին չհետեւի:
Այս օրենքը պարտավորեցնում է ռուսաստանցիների անձնական տվյալները երկրի տարածքում պահպանել: Ծառայությունը օրենքը խախտող կայքերին հատուկ ռեեստրում է ներառում եւ հետագա պահանջները չկատարելու դեպքում՝ արգելափակում:
Անցյալ տարի ծառայույունը արգելափակել էր LinkedIn-ը:
