«Ազգային ինքնորոշում միավորման» առաջնորդ Պարույր Հայրիկյանը ժամանակ է տվել ԿԸՀ նախագահ Տիգրան Մուկուչյանին իր պահանջները կատարելու համար, հակառակ դեպքում, կդիմի ՀՀ գլխավոր դատախազին՝ նրա դեմ քրեական գործ հարուցելու պահանջով: Այս մասին այսօր՝ նոյեմբերի 23-ին, NEWS.am-ի հետ զրույցում ասաց նա՝ նշելով, որ այսօր կրկին գնացել է Կենտրոնական Ընտրական հանձնաժողովի շենք եւ հանձնել քաղվածքներ Հայաստանի միջազգային մակարդակով ընդունած պարտավորագրերից:
«Այդ փաստաթղթերը տվել եմ, որ ինքը հասկանա, որ անգամ, եթե Սահմանադրությամբ նախանշված օրենքը դեռ չի գործում, ապա միջազգային իրավունքի նորմերը օրենքից բարձր են: Դրանից ելենով պարտավոր էր դրանք որպես օրենք ընկալել եւ արձագանքել: Վերջնաժամկետ տվեցի, եթե մինչեը վաղը ժամը 12-ը մեր նվազագույն պահանջը՝ ներկայացնել այն, ինչն անհրաժեշտ է ստորագրությունները վավեր համարելու համար, չարվի, կդիմեմ գլխավոր դատախազին՝ քրեական գործ հարուցելու պահանջով: Իշխանության չարաշահման ճանապարհով քաղաքացիների իրավունքները ոտնահարելը լուրջ, ծանր հանցագործություն է»,-ասաց նա:
Պարույր Հայրիկյանը նաեւ նշեց, որ վաղվանից դադարեցնում է 5 օր տեւած հացադուլը:
Նշենք, որ Պարույր Հայրիկյանը ԿԸՀ դիմում էր հանձնել՝ պահանջելով իրեն տրամադրել համապատասխան տեղեկատվություն, թե Սահմանադրական փոփոխությունների հանրաքվե նախաձեռնելու համար անհրաժեշտ 200 հազար ստորագրողներն ինչ տվյալներ պետք է տան` անուն, անձնագրի տվյալներ, թե նաեւ բնակության հասցեն է պետք:
Հիշեցնենք, որ նա, օրեր առաջ հիմք ընդունելով նոր Սահմանադրության 202-րդ հոդվածը, ստորագրահավաքի միջոցով սահմանադրության մեջ նոր փոփոխություններ իրականացնելու համար հանրաքվե անցկացնելու համար դիմել էր ԿԸՀ, որը մերժվել էր: Պարույր Հայրիկյանը ԿԸՀ-ից ձեւաթուղթ էր պահանջել, որպեսզի ստորագրավահաք կարողանա սկսել: Պարույր Հայրիկյանը պնդում է, որ ինքն ունի հանրաքվե նախաձեռնելու իրավունք, եւ պետական կառույցի պարտականությունն է այդ ուղղությամբ քայլեր ձեռնարկելը: