Հայաստանի զարգացման հիմնադրամը աշխարհի 4 առաջատար ընկերություններից ստացել է «Նոյ» ազգագրական թաղամասի ճարտարապետական եւ բիզնես պլանավորման նախագծերը եւ ներկայացնում է մասնագետների քննարկմանը։

Հայաստանի զարգացման հիմնադրամի լրատվական ծառայությունից NEWS.am-ին հայտնում են, որ 4 նախագծերի էլեկտրոնային տարբերակները եւ հարցաթերթիկը հասանելի են հետեւյալ հղումով՝ http://bit.ly/2AacYFw։ Ազգագրագետների, ճարտարապետների, տուրիզմի մասնագետների ու հանրության այլ անդամների ուղարկած կարծիքները խմբավորելուց, մշակելուց հետո կներկայացվեն ներդրողներին եւ կընտրվի հաղթող ընկերությունը։ 

ՀԶՀ հայտարարած մրցույթին մասնակցել եւ աշխատանք են ներկայացրել ամերիկյան «AECOM», բրիտանական «ARUP» , լիբանանյան «ERGA» եւ ամերիկյան «SWA»  ընկերությունները, որոնք զբոսաշրջային ուղղությունների ծրագրման 30-60 տարվա հաջող փորձ ունեն աշխարհով մեկ։

Հայաստանի զարգացման հիմնադրամը մրցույթի մասնակիցների առջեւ խնդիր էր դրել ստեղծել Հայաստանի տարբեր տարածաշրջանների ճարտարապետական, խոհանոցային, արվեստի, արհեստների լավագույն մշակույթը, սովորույթներն ու ավանդույթները ներկայացնող թաղամասի հայեցակարգ։

«Մասշտաբային ներդրումային ծրագրով Երեւանում կառուցվելիք թաղամասը կմեծացնի Հայաստանի զբոսաշրջային բազմազանությունն ու գրավչությունը։ Ծրագրի բիզնես տրամաբանությամբ, Երեւան այցելող զբոսաշրջիկը թաղամասում, որպես այցեքարտ, ծանոթանալով, ասենք, Գորիսի կամ Լոռվա կոլորիտին, կշահագրգռվի այցելել նաեւ մարզեր ու ավելին տեսնել»,- նշել է Հայաստանի զարգացման հիմնադրամի գործադիր տնօրեն Արմեն Ավակ Ավակյանը։

Նախնական գնահատմամբ շուրջ 150 միլիոն դոլարի ներդրումով թաղամասի կառուցման ծրագրի մասին հայտարարել է վարչապետ, ՀԶՀ հոգաբարձուների խորհրդի նախագահ Կարեն Կարապետյանը։

Լավագույն նախագծի ընտրությունից հետո հաղթող ընկերությունը փետրվարին կներկայացնի թաղամասի մաստեր պլանը, շինարարությունը նախատեսվում է սկսել գարնանը։