Երեւանի Շենգավիթ վարչական շրջանի ընդհանուր իրավասության դատարանում այսօր՝ նոյեմբերի 28-ին, «Սասնա ծռեր» զինված խմբի գործով առանձնացված 2-րդ մասով նիստին ամբաստանյալներից Տիգրան Մանուկյանի շահերի պաշտպան Մուշեղ Շուշանյանը միջնորդություն ներկայացրեց իր պաշտպանյալի խափանման միջոցը փոխելու մասին:
Նա նշեց, որ իր պաշտպանյալին կալանքի տակ պահելու ժամկետը լրացել է սույն թվականի հունիսի 30-ին եւ նա պետք է անհապաղ ազատ արձակվի:
«Տիգրան Մանուկյանը 2016թ. հուլիսի 31-ից գտնվում է կալանքի մեջ, դատարանի կողմից պարբերաբար երկարացվել է նրա կալանքը, շարունակական կալանքի բողոքարկումներն անարդյունավետ են եղել: Դատարանները ոչ թե ընտրել են խափանման միջոց, այլ որոշել են անփոփոխ թողնել խափանման միջոցը, որի իրավասությունը դատարանը չունի: Պաշտպանյալիս կալանքի տակ պահելու ժամկետը սույն թվականի հունիսի 30-ին է լրացել: Պաշտպանյալս պետք է անհապաղ ազատ արձակվի»,- ասաց Մուշեղ Շուշանյանը՝ նշելով, որ իր պաշտպանյալը զինված ապստամբություն է արել ներկայիս իշխանությունների դեմ, որի համար չպետք է քրեական հետապնդման ենթարկվի:
Նրա խոսքով, «Սասնա ծռեր» խմբի անդամներն անազատության մեջ են պահվում որպես ռազմագերիներ: Միջնորդությունը ներկայացնելուց հետո ամբաստանյալներից Արամ Մանուկյանը արձագանքեց. «Տիկո, աչքիս քեզ անհապաղ ազատ չարձակեն»:
Պաշտպանները միացան Մուշեղ Շուշանյանի ներկայացրած միջնորդությանը:
Մեղադրողները առարկեցին ներկայացված միջնորդությանը` նշելով, որ այն հիմնավոր չէ:
Դատարանը խորհրդակցական սենյակից վերադառնալուց հետո մերժեց Մուշեղ Շուշանյանի միջնորդությունը:
Իր պաշտպանյալի խափանման միջոց կալանքը փոխելու վերաբերյալ միջնորդություն ներկայացրեց նաեւ ամբաստանյալներից Արամ Մանուկյանի շահերի պաշտպան Հարություն Բաղդասարյանը: Նա եւս մատնանշեց, որ իր պաշտպանյալի խափանման միջոցի վերաբերյալ դատարանն առանձին որոշում չի կայացրել եւ նրա նկատմամբ կիրառված խափանման միջոց կալանավորումն անհիմն է: Հարություն Բաղդասարյանը միջնորդության մեջ նաեւ նշեց, որ «Սասնա ծռեր» խմբի անդամները ապստամբության են գնացել Հայաստանում տիրող քաղաքական իրավիճակի պատճառով` նշելով, որ այդպիսով փորձելով պահպանել Արցախի ամբողջականությունը, հայ ժողովրդին ստեղծված իրավիճակից ազատելու համար: Պաշտպանը նաեւ անդրադարձավ Մարտի 1-ի իրադարձություններին եւ զոհերին` նշելով, որ այդ ամենը տեղի է ունեցել երկրում տիրող ներքաղաքական իրավիճակի պատճառով:
Պաշտպանի` միջնորդության ներկայացումից հետո նախագահող դատավոր Արթուր Օհանյանը ասաց. «Պաշտպանի կողմից քաղաքական ատրիբուտներ ներկայացնելը ճիշտ չէ, նա իրավասու է միայն իրավաբանական օգնություն ցույց տալ իր պաշտպանյալին»: Պաշտպաններ, սակայն, առարկեցին դատարանի գործողություններին` նշելով, որ դատարանն իրավունք չունի պաշտպանին կշտամբելու եւ պետք է զերծ մնա փաստաբանին «դասեր տալուց»:
Մեղադրող Հակոբ Ենոքյանն էլ նշեց, որ պաշտպան Հարություն Բաղդասարյանի միջնորդությունն ավելի շատ նման էր Ազգային ժողովում քաղաքական գործչի ելույթի, քան միջնորդության եւ այն ենթակա է մերժման: Դատախազի առարկության ժամանակ ամբաստանյալներից Մարտիրոս Հակոբյանը բարձրացավ տեղից եւ ցանկանում էր հեռանալ նիստերի դահլիճից:
Ամբաստանյալներից Արամ Հակոբյանն էլ հայտարարությամբ հանդես եկավ եւ նշեց. «30 տարի անընդհատ պայքարել եմ հանուն մեր ժողովրդի, այս տարիների ընթացքում ոչ մի արդար ընտրություն չեմ տեսել: Ի՞նչ կառաջարկեիք անել մեզ, այդ պատճառով էլ գնացել ենք այդ քայլին: Ասում եք` մեր տղաները ռազմական բախման ընթացքում են վիրավորվել, դա այդպես չէ, նրանք սառնասրտորեն գնդակահարվել են դիպուկահարի կողմից: Սա քաղաքական դատավարություն է, հաշվերահարդար իշխանությունների կողմից մեր նկատմամբ»:
Ամբաստանյալներից Վարդան Գերավետյանն էլ նշեց, որ «Սասնա ծռեր» խմբի անդամներից երեք հոգի այս պահին ազատության մեջ է գտնվում եւ անհասկանալի է` ինչու են իրենք անազատության մեջ. «Նրանք մեղադրվում են նաեւ ՊՊԾ տարածքի բանկոմատից գումար հափշտակելու մեջ, սակայն, ազատության մեջ են: Ի՞նչ է ստացվում, որոնք որ պայքարի ավյուն ունեն, գրագետ են, պետք է անազատության մեջ գտնվեն, իսկ անգրագետները կարող են ազատության մեջ գտնվել»:
Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանի վարույթում գտնվող այս գործով արտագնա նիստը նախագահում է դատավոր Արթուր Օհանյանը:
Այս գործով կա 11 ամբաստանյալ՝ Արամ Մանուկյան, Հովհաննես Հարությունյան, Թաթուլ Թամրազյան, Արամ Հակոբյան, Տիգրան Մանուկյան, Արայիկ Հակոբյան, Վարդան Գերավետյան, Մարտիրոս Հակոբյան, Սերգեյ Կյուրեղյան, Գեւորգ Իրիցյան, Թորոս Թորոսյան:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: «Սասնա ծռեր» խմբի 11 անդամի մասով գործը քննում է Արտուշ Գաբրիելյանը Ավան եւ Նոր Նորք վարչական շրջանների ընդհանուր իրավասության դատարանում, իսկ անջատված մասերով մյուս գործը Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանը: