Նախագահ Սերժ Սարգսյանն այսօր մասնակցել է Հատուկ քննչական ծառայության կազմավորման 10-ամյակին նվիրված նիստին: Ի տարբերություն նախկինում իրավապահ մարմիններում եւ ուժային կառույցներում ունեցած սուր եւ քննադատական ելույթներին՝ նախագահի խոսքում այսօր գրեթե կշտամբանք չի հնչել, նա Վահրամ Շահինյանի ղեկավարած կառույցից, կարծես, գոհ է:

Սերժ Սարգսյանը նախ շեշտել է՝ որքան մեծ լինեն քննիչների հաջողություններն օրենքի առջեւ բոլորի հավասարությունը երաշխավորելու գործում, այնքան տեսանելի ու զգալի կլինի երկրում արդարադատության հաղթանակը:

Սերժ Սարգսյանն արձանագրել է, որ կոռուպցիայի դեմ պայքարը պետք է ստանա շատ ավելի կոշտ, շատ ավելի խորքային եւ ժամանակին համահունչ դրսեւորումներ, ապա քննիչներին հորդորել աշխատելիս չկաշկանդվել պաշտոնյաների անունների հանդիպելիս: 

Նախագահը դրական է գնահատել նաեւ ընտրություններին առնչվող քրեական գործերի քննությունը, բայց նաեւ ընդգծել, որ պետք է շարունակել տքնաջան աշխատանքը։ 

Աշխատանքային այցով Երեւան է ժամանել Իրանի արտգործնախարար Մոհամմադ Ջավադ Զարիֆը: Նախարարների բանակցությունների արդյունքներով տեղի ունեցած համատեղ մամուլի ասուլիսում Էդվարդ Նալբանդյանն իրանական կողմին շնորհակալություն է հայտնել ղարաբաղյան հակամարտության բացառապես խաղաղ կարգավորման հարցում հավասարակշռված դիրքորոշման համար: Նախարարը տեղեկացրել է, որ բանակցությունների ընթացքում կողմերը քննարկել են երկու երկրների նախագահների միջեւ պայմանավորվածությունների եւ որոշ ծրագրերի իրականացումը, համագործակցությունն էներգետիկայի եւ հաղորդակցության ոլորտում: Առանձին անդրադարձ է եղել նաեւ ԵՏՄ-ին:

Զարիֆն իր հերթին հայտարարել է, որ Իրանի եւ Հայաստանի միջեւ ակտիվ կապերը վերջին տարիներին զարգանում են քաղաքական եւ տնտեսական ոլորտներում։ Մասնավորապես, Իրանի արտգործնախարարը նշել է էներգետիկայի եւ տարանցման, բնապահպանության եւ գիտության ոլորտում աշխատանքը։ Այցի շրջանակում Զարիֆը հանդիպել է նաեւ Հայաստանի նախագահի եւ վարչապետի հետ:

Հայ-ադրբեջանական սահմանին հայտնաբերված ադրբեջանցի զինծառայողի մարմինն այսօր հանձնել են Ադրբեջանին։ Մարմինը փոխանցել են Նախիջեւանի ուղղությամբ ԿԽՄԿ ներկայացուցիչների մասնակցությամբ։ Հիշեցնենք, որ ադրբեջանցու դին հայտնաբերվել էր նոյեմբերի 23-ին, հայ-ադրբեջանական սահմանի միջեւ չեզոք գոտում: Ըստ օպերատիվ տեղեկությունների՝ զոհվածը Ադրբեջանի ԶՈւ կապիտան Բահրուզ Ջալիլբեյլիին, որը փախել է զորամասում տեղի ունեցած միջադեպից։

Արցախի դիրքերից մեկում այս տարվա մարտին ծառայակցին սպանելու մեջ մեղադրվող Միքայել Զաքարյանին Արցախի դատարանը դատապարտել է 10 տարի եւ 3 ամիս ազատազրկման: Սպանված Հովհաննես Հարությունյանի մայրը դժգոհ է դատավճռից. մեր թղթակցի հետ զրույցում այն անարդար եւ խիստ մեղմ պատիժ է որակել: Տուժողի իրավահաջորդը պատրաստվում է բողոքարկել դատավիճռը: Նշենք, որ մեղադրողը Միքայել Զաքարյանի համար 15 տարի էր պահանջել: Ըստ մեղադրանքի՝ Միքայել Զաքարյանը ինքնաձիգով դիտավորությամբ մեկ անգամ կրակել է ծառայակից Հովհաննես Հարությունյանի վրա ու սպանել: Զաքարյանն իրեն մեղավոր չի ճանաչել:

Արցախի պաշտպանության բանակի նախկին հրամանատար Սամվել Բաբայանն այսօր դատապարտվեց 6 տարվա ազատազրկման: Կենտրոն եւ Նորք-Մարաշ վարչական շրջանների ընդհանուր իրավասության դատարանը Բաբայանին մեղավոր ճանաչեց առաջադրված մեղադրանքի երկու դրվագներով էլ՝ փողերի լվացում եւ անօրինական ճանապարհով Հայաստան «Իգլա»-ի տեղափոխում: Դատավճռի հրապարակումից հետո Պաշտպանության բանակի նախկին հրամանատարը հայտարարեց, որ սա քաղաքական պատվեր է:

Հիշեցնենք, որ ապրիլյան պատերազմից հետո Հայաստան վերադարձած Սամվել Բաբայանը միացել էր խորհրդարանական ընտրություններին մասնակցող «ՕՐՕ» դաշինքին: Ընտրություններից առաջ, սակայն, Սամվել Բաբայանը ձերբակալվեց եւ մեղադրվեց նախ «Իգլա» Հայաստան տեղափոխելու մեջ, ապա նաեւ փողերի լվացման: Նրա համախոհները քրեական գործը կապեցին Բաբայանի քաղաքական գործունեության հետ: Այս գործով դատաքննությունն ընդհանուր առմամբ տեւեց ընդամենը 4 ամիս, Սամվել Բաբայանը մինչեւ վերջ էլ իրեն առաջադրված մեղադրանքը չընդունեց: Այսօր դատավճռի հրապարակումից հետո Բաբայանի պաշտպան Ավետիս Քալաշյանը նշեց, որ դատարանը խիստ պատիժ սահմանեց՝ այս կերպ փորձելով թույլ չտալ, որ իր պաշտպանյալը համաներմամբ ազատվելու հնարավորություն ունենա:

«Սասնա ծռեր» զինված խմբի գործով առանձնացված 2-րդ մասով դատական նիստն այսօր եւս լարված մթնոլորտում է անցել: Փաստաբան Հարություն Բաղդասարյանը նիստը նախագահող դատավոր Արթուր Օհանյանին ինքնաբացարկի միջնորդություն է ներկայացրել, երբ դատարանը պաշտպանին կոչ է արել միջնորդություններում «քաղաքական ատրիբուտներ»  չօգտագործել: Պաշտպաններն առարկել են դատավորի գործողությունների դեմ՝ դրանք որակելով «կշտամբանք եւ պաշտպանին դաս տալու փորձ»: Բանն այն է, որ երբ Հարություն Բաղդասարյանն իր պաշտպանյալի խափանման միջոց կալանքը փոխելու մասին միջնորդություն է ներկայացրել, «Սասնա ծռերի» անդամներին քաղբանտարկյալներ է ավարտել, իշխանություններին մեղադրել է ժողովրդի ձեռքից իշխանությունը վերցնելու մեջ եւ անդրադարձել Մարտի 1-ի դեպքերին ու զոհերին:

Մեղադրող Հակոբ Ենոքյանը պաշտպանի այս միջնորդությունը համեմատել է Ազգային Ժողովում ելույթ ունեցող քաղաքական գործչի հետ: Մեղադրողի առարկության ժամանակ ամբաստանյալներից Մարտիրոս Հակոբյանը, որպես բողոքի նշան, փորձել է լքել նիստերի դահլիճը, բայց ոստիկանները թույլ չեն տվել: Այնուհետեւ Մարտիորոս Հակոբյանն իշխանություններին համեմատել է «ղզլբաշների» հետ, իսկ դատարանին մեղադրել իշխանությունների գործիքը դառնալու մեջ:

Դատարանն այսօր մերժել է ամբաստանյալներից Տիգրան Մանուկյանի, Արամ Մանուկյանի եւ Վարդան Գերավետյանի խափանման միջոց կալանքը վերացնելու մասին պաշտպանների բողոքը: Հաջորդ դատական նիստը դեկտեմբերի 5-ին է:

Ամերիկյան մամուլն արդեն մի քանի օր է՝ գրում է 25-ամյա Գրիգոր Ազատյանի մասին, որը հրաշքով է փրկվել սպիտակ շնաձկան հարձակումից: Դեպքի տեղի է ունեցել Քալիֆորնիայի Մոնթերեյ նեղուցում, որտեղ Գրիգորը հոր հետ գնացել էր ստորջրյա որսի: Գրիգորի հայրը՝ Արմեն Ազատյանը լրագրողներին պատմել է, որ դեպքի պահին որդին տեսախցիկով նկարահանումներ է արել, երբ տեսել է սպիտակ շնաձկանը։ «Շնաձուկը բռնել եւ բաց չէր թողնում, երկու տեղից՝ ազդրից եւ ծնկից կծել էր։ Գրիգորը չի կարողացել հասնել ոտքին ամրացված դանակին, բայց հարվածել է շնաձկան երախին եւ կարողացել ազատել ոտքը»,- ասել է Արմեն Ազատյանը: Չնայած ծանր վնասվածքներին՝ Արմենը նշել է, որ որդու բախտը բերել է։ Գրիգոր Ազատյանին առաջիկայում եւս մեկ վիրահատություն է սպասվում:

Դիրիժոր Կոնստանտին Օրբելյանը «Գրեմմի 2018» հեղինակավոր երաժշտական մրցանակաբաշխության հավակնորդների ցանկում է: Նա Դմիտրի Խվորոստովսկիի հետ առաջադրվել է «Լավագույն դասական սոլո վոկալ ալբոմ» անվանակարգում «Սվիրիդով. Հեռացող Ռուսաստան» սկավառակի համար: Մրցանակաբաշխությունը տեղի կունենա 2018թ. հունվարի 28-ին Նյու Յորքում։

Դոլարի փոխարժեքն աճում է, եվրոյինը՝ նվազում: Նոյեմբերի 28-ին դոլարի փոխարժեքը կազմել է 484.21 դրամ, եվրոյինը՝ 575, ռուբլունը՝ 8 դրամ 30 լումա, ֆունտինը՝ 644 դրամ:

Հանրապետության շրջանների զգալի մասում նոյեմբերի 29-ին սպասվում են տեղումներ: Օդի ջերմաստիճանը նոյեմբերի 29-ի գիշերը կբարձրանա 3-4, դեկտեմբերի 1-ի գիշերը կնվազի 2-3 աստիճանով: Մայրաքաղաքում գիշերը կդիտվի -1+1, ցերեկը՝ +7+9 աստիճան տաքություն: