Հայաստանի Հանրապետական կուսակցության համար տարին հոբելյանական էր։ Դեկտեմբերի 20-ին տեղի ունեցած մամուլի ասուլիսի ժամանակ այս մասին հայտարարեց Հայաստանի հանրապետական կուսակցության մամուլի խոսնակ Էդուարդ Շարմազանովը։
ՀՀԿ 20-ամյակին նվիրված համագումարում երկրի նախագահ, կուսակցության առաջնորդ Սերժ Սարգսյանը, Շարմազանովի խոսքով, ներքին եւ արտաքին հարցերի շուրջ խոսելիս ընդգծել է առաջնահերթությունները, որոնք խթան են հանդիսանում ոչ միայն ՀՀԿ անդամների, պաշտոնյաների, այլ նաեւ հասարակության համար։
Շարմազանովի խոսքով, առաջին խթանը հանդիսացավ ՀՀ նախագահի այն հայտարարությունը, որ ՀՀԿ-ն ազգային պահպանողական կուսակցություն է եւ շարունակելու է 90-ականների գաղափարախոսության վրա հիմնված քաղաքականությունը. «ՀՀԿ հպարտանումն է, որ ունեցել է ղարաբաղյան պատերազմին եւ Հայաստանի կայացման գործին լուրջ մասնակցություն բերած առաջնորդներ։ Մենք պետք է շարունակենք այն գործը, որ սկսել են Աշոտ Նավասարդյանը, Վազգեն Սարգսյանը եւ Անդրանիկ Մարգարյանը։ Պետք է անել ամեն բան՝ նրանց երազանքի Հայաստանը կառուցելու համար»։
Սակայն, Շարմազանովի կարծիքով, հարց է ծագում՝ ունե՞նք, արդյոք, այն Հայաստանը, որի մասին նրանք երազում էին։ «Բնականաբար, մենք ունենք շատ ձեռքբերումներ, սակայն առկա են նաեւ շատ թերություններ, որոնք ուղղելու համար պետք է քայլեր ձեռնարկել»,- ասաց Շարմազանովը:
Նա տեսակետ հայտնեց, որ ներկայիս իշխանությունը նախորդներից տարբերվում է նրանով, որ ջայլամային քաղաքականություն չի վարում եւ չի թաքցնում առկա թերությունները՝ ասելով, որ երկրում կա կոռուպցիա, կան անբարեխիղճ չինովնիկներ եւ կան խնդիրներ։ «Գաղտնիք չէ, որ երկրի բնակչության մի մասը արդարության դեֆիցիտ է զգում։ Որպեսզի այդ պակասը լրացվի, անհրաժեշտ է, որ շարքային քաղաքացին տեսնի, որ այս կամ այն չինովնիկի որդին եւ ինքը հավասար են օրենքի առջեւ»,- նշեց Շարմազանովը։
