Եկել է «ըստ հաշիվների» վճարելու ժամանակը: Այս մասին դեկտեմբերի 5-ին ԱԺ-ում ասաց «Ելք» դաշինքի խմբակցության պատգամավոր Գեւորգ Գորգիսյանը՝ առաջին անհրաժեշտության ապրանքների գների աճի առիթով դիմելով բնակչությանը:
Նրա համոզմամբ՝ 2018 թվականին հայ ժողովրդին ծանր ժամանակներ են սպասում: «Երբ ասում էինք՝ մի՛ վերցրեք այդ 10 հազարները, որոնք որպես ընտրակաշառք էին առաջարկվում, որ հետագայում դրա համար ստիպված կլինեք զգալիորեն ավելի թանկ վճարել, շատերը չլսեցին: Հիմա եկել է վճարելու ժամանակը»,- նշեց Գորգիսյանը՝ հավելելով, որ վերջին մի քանի ամիսներին արդեն թանկացել են առաջին անհրաժեշտության մթերքները եւ դեռեւս շարունակում են թանկանալ:
Դրա հետ մեկտեղ նա ընդգծեց, որ Հայաստանում մի շարք տեսակի ապրանքներ կթանկանան Հայաստանի Եվրասիական տնտեսական միությանն անդամակցության հետ կապված, որի Մաքասային օրենսգրքի ներդրումը կհանգեցնի մաքսատուրքերի բարձրացման: