Փարիզում Լիբանանի հարցով միջազգային հանդիպում է անցկացվում: Հանդիպմանը մասնակցում է ԱՄՆ պետքարտուղար Ռեքս Թիլերսոնը, որը հայտարարել է «Լիբանանի ինքնիշխանությանը, կայունությանը եւ անկախությանը» Վաշինգթոնի աջակցության մասին, փոխանցում է AP-ն:
Լիբանանի վարչապետ Սաադ Հարիրին եւս մասնակցում է Ֆրանսիայում միջազգային դիվանագետների գագաթնաժողովին: Սա առանցքային երկրների առաջին խոշոր հանդիպումն է Հարիրիի հրաժարականի պատճառով երկրում ստեղծված քաղաքական ճգնաժամից հետո Լիբանանի ապագայի քննարկման համար:
Փարիզ ժամանելով Հարիրին Twitter-ում գրել է, որ հանդիպումը կարեւոր նշանակություն կունենա Լիբանանի տնտեսության աջակցության համար:
Ֆրանսիայի նախագահ Էմանուել Մակրոնն իր ելույթում արտասահմանյան ուժերին կոչ է արել դադարեցնել միջամտությունը Լիբանանի ներքին քաղաքականությանը: Նա նաեւ Լիբանանում բոլոր կողմերին կոչ է արել հեռու մնալ տարածաշրջանային հակամարտություններից: «Որպեսզի Լիբանանը կարողանա տարածաշրջանային տարբեր ճգնաժամերից իրեն պաշտպանել կարեւոր է հարգել չմիջամտելու սկզբունքը»,- ասել է նա: