Կառավարության այսօրվա նիստին վարչապետ Կարեն Կարապետյանը հակակոռուպցիոն գործող ռազամավարության արդյունավետության ու նոր ռազմավարության վերաբերյալ հանձնարարական հնչեցրեց: Նա հայտարարեց, որ նախատեսվում է նոր հավակնոտ հակակոռուպցիոն ռազմավարություն մշակել:
Վարչապետի խոսքով, 2015 թվականից ի վեր, երբ ընդունվել էր Հակակոռուպցիոն ռազմավարությունը, իրականացվել են մի շարք միջոցառումներ՝ ուղղված կոռուպցիայի դեմ պայքարին եւ կոռուպցիոն երեւույթների կանխարգելմանը:
«Ռազմավարությունից բխող որոշ միջոցառումներ դեռեւս ընթացքի մեջ են, սակայն հարկավոր է արդեն այս փուլում ձեռնարկել միջացառումներ՝ նոր հավակնոտ հակակոռուպցիոն ռազմավարություն մշակելու ուղղությամբ՝ զուգահեռ ներդնելով նոր ռազմավարության կատարման մոնիթորինգի եւ արդյունքների գնահատման մեխանիզմները»,- ասաց Կարեն Կարապետյանը:
Նա հանրապետական գործադիր մարմինների ղեկավարներին հանձնարարեց ավարտել գործող հակակոռուպցիոն ռազմավարությունից բխող անհրաժեշտ օրենսդրական փաթեթների մաշակման եւ միջոցառումների կատարման աշխատանքները, նաեւ 30-օրյա ժամկետում ըստ ոլորտների մշակել հակակոռուպցիոն նոր ռազմավարության վերաբերյալ առաջարկություններ եւ ներկայացնել արդարադատության նախարարությանը:
Կառավարության աշխատակազմի ղեկավարին վարչապետը հանձնարարեց 15-օրյա ժամկետում ավարտին հասցնել ներկայումս գործող 4 ոլորտային հակակոռուպցիոն միջացառումների մոնիթորինգի եւ գնահատման մեխազնիզմների մշակման աշխատանքները, ամփոփել Հակակոռուպցիոն ռազմավարությամբ նախատեսված եւ իրականացված միջացառումներն ու դրանց արդյունքները:
Արդարադատության նախարարին վարչապետը հանձնարարեց նոր հավակնոտ հակակոռուպցիոն ռազմավարություն մշակելու ուղղությամբ հստակ արձանագրել թիրախային ոլորտներ, մոնիթորինգային եւ գնահատման ցուցանիշներ, կոնկրետ միջոցառումներ՝ ուղղված կոռուպցիայի կանխարգելմանն ու կոռուպցիոն հանցագործությունների քննության համակարգի արդյունավետության բարձրացմանը:
«Նոր փաստաթղթի մշակման աշխատանքներին պետք է հնարավորինս ներգրավել քաղաքացիական հասարակության ներկայացուցիչներին, գործարարներին, իրավաբաններին, գիտնականներին եւ այլ շահագրգիռ մարմիններին»,- հավելեց վարչապետը:
