Եթե իշխանությունների գործունեությունը վերահսկվում է, ապա նրանք հասկանում են, որ թե՛ հասարակական կազմակերպությունները, թե՛ խորհրդարանական վերահսկողության ինստիտուտները, թե՛ մամուլը, թե՛ դատական իշխանությունները կհետեւեն, որ որեւէ իրավախախտման դեպքում մեղավորները պատասխանատվության ենթարկվեն: Այս մասին դեկտեմբերի 15-ին ԱԺ-ում Պաշտպանության եւ անվտանգության հարցերով մշտական հանձնաժողովի կազմակերպած «Զինված ուժերի խորհրդարանական վերահսկողություն» միջազգային սեմինարի ժամանակ ասաց «Մարդկային զարգացման միջազգային կենտրոն» հասարակական կազմակերպության ղեկավար Թեւան Պողոսյանը:
Նրա խոսքով՝ անհրաժեշտ է ինստիտուտներ ստեղծել, որոնք պատասխանատու կլինեն կոնկրետ իրավախախտումների համար համապատասխան պատասխանատվության ենթարկելու հարցում: «Ցավոք, կառավարման ժողովրդավարական համակարգում ընդհանրապես, մեր երկրում մասնավորապես այս փոխակերպումների ժամանակահատվածում մեծ խնդիրներ կան, եւ հատկապես՝ դատական համակարգում»,- նշեց Պողոսյանը՝ հավելելով, որ եթե իշխանությունները չիմանան, որ իրենց վերահսկում են, ապա խախտումները կկատարվեն, մեծ խնդիրներ կառաջանան համընդհանուր վերահսկողության իրականացման առումով:
