Դիլիջանի քաղաքային տրանսպորտի վիճակը մտահոգիչ է, սակայն, այն մոտ ապագայում կբարելավվի: NEWS.am-ի հետ զրույցում Դիլիջանի քաղաքապետարանի հասարակայնության եւ լրատվության հետ կապերի վարչության պետ Ալբերտ Սիմոնյանը նշեց, որ 2018թ. Դիլիջան քաղաքը կունենա 5 նոր ավտոբուս. ներկրման հայցերին մասնակցելու համար դեկտեմբերի 23-ին հայտարարվել է մրցույթ:
«Ծրագրերից մեկը վերաբերում է տրանսպորտի արդիականացման խնդիրներին: ԵՄ աջակցությամբ Դիլիջանն արտասահմանյան արտադրության ավտոբուսներ է ստանալու ներքաղաքական տրանսպորտի եւ գյուղական համայնքները սպասարկելու համար: Դեկտեմբերի 23-ին հայտարարված է մրցույթ ներկրման հայցերին մասնակցելու համար, որ կազմակերպությունը որ մրցույթը շահի, եկող տարվա սկզբից կսկսեն ներկրել ավտոբուսներ»,-ասաց նա:
Ալբերտ Սիմոնյանի խոսքով, Դիլիջանի քաղաքային տրանսպորտի ոլորտում բազմաթիվ խնդիրներ կան. ավտոբուսները քիչ են եւ հին, հենց դա էլ առաջացնում է բնակիչների դժգոհությունը. «Մենք մեծ հույս ունենք, որ հունվարից արդեն նոր ավտոբուսներ կունենանք եւ այս խնդիրը կլուծվի»:
