Նոյեմբերը Ռուսաստանի արդյունաբերության համար բավականին անբարենպաստ էր. արտադրության ֆիզիկական ծավալը տարեկան հաշվարկով 3,6 տոկոսով նվազել է: Սա անակնկալ էր ռուս եւ օտարազգի շատ փորձագետների համար, ովքեր կանխատեսում էին հակառակ արդյունքը:
Նշենք, որ այս տարի մինչեւ նոյեմբեր ռուսական արդյունաբերության ոլորտում անկումը գրանցվել է միայն մեկ անգամ`փետրվարին (2,7 տոկոս): Ինչպես տեսնում եք, նոյեմբերյան ցուցանիշը փետրվարից վատն էր, եւ վերջին ութ տարիների ընթացքում ՌԴ համար դարձավ հակառեկորդային:
Նշենք մեկ կարեւոր մանրուք՝ իր դերը ունեցել է հիմնական ամիսներին արդյունաբերության արտադրանքի ծավալի մակարդակը:
Անցյալ տարի, ինչպես փետրվարը, այնպես էլ նոյեմբերը, ՌԴ արդյունաբերության համար նշանավորվել են աճի ամենաբարձր ցուցանիշներով՝ համապատասխանաբար՝ 3,8 տոկոս եւ 3,4 տոկոս:
Անկումը նկատվել է արդյունաբերություն բոլոր ճյուղերում` հանքարդյունաբերությունից (1,0 տոկոսով) մինչեւ էլեկտրաէներգիայի, գազի եւ գոլորշու (6,4 տոկոս) ապահովում: Բացառություն չի եղել նաեւ մշակող արդյունաբերության ոլորտը, որի արտադրության ֆիզիկական ծավալը կրճատվել է 4,7 տոկոսով:
Ապրանքների տեսակների տեսանկյունից հաշվետու ամսվա ընթացքում արտադրության դինամիկան բազմակողմանի է եղել: Օրինակ, սննդի արտադրության բնագավառում: Անասունների մսի արտադրանքը աճել է 7,3 տոկոսով, իսկ թռչնի մսինը՝ 12,7 տոկոսով: Բացառիկ աճ է գրանցվել կարագի դեպքում` 17,6 տոկոս:
Դրա հետ մեկտեղ կրճատվել է հացի արտադրությունը՝ տարեկան հաշվարկով 3 տոկոսով:
Նվազել են նաեւ ձկան եւ բուսական յուղի արտադրության ծավալները: Նշենք, որ նշված փոփոխությունները տեղի են ունենում ռուսաստանցիների իրական եկամուտների կրճատման ֆոնին:
Նոյեմբերն, իհարկե շինարարության շրջան չէ:
Սակայն, եթե դիտարկենք տարվա ընթացքում դինամիկան, ապա որոշ շինարարական նյութերի աճ է նկատվում:
Այսպիսով, նոյեմբերին ապրանքային բետոնի արտադրությունը աճել է 7,8 տոկոսով, ցեմենտը` 11,8 տոկոսով, ասֆալտը` 1,4 անգամ եւ այլն: Նշենք, որ Ռուսաստանում շինարարության ծավալը հունվար-հոկտեմբերին աճել է 4,2 տոկոսով (չնայած, հոկտեմբերին կար անկում՝ 2,3 տոկոսով): Այս ոլորտում փոփոխությունները ոչ պակաս նշանակություն ունեն նաեւ մեր երկրի համար, քանի որ Ռուսաստանում մեր սեզոնային աշխատանքային միգրանտների զգալի մասը շինարարությամբ է զբաղվում:
Սմբատ Գրիգորյան