Ադրբեջանի պաշտպանության նախարար Յավեր Ջամալովի հնչեցրած տեղեկատվության հոսքը նախատեսված էր ներքին լսարանի համար: Այսպիսի կարծիք հայտնեց ռազմական փորձագետ Արկադի Գրիգորյանը՝ NEWS.am-ի թղթակցի խնդրանքով մեկնաբանելով լրատվամիջոցներին տված հարցազրույցում ադրբեջանական նախարարի հայտարարությունները:
«Առաջին հայացքից Ադրբեջանի նախարարի կողմից հնչեցված թվերի ծավալը տպավորիչ է: Սակայն, ըստ էության, այս ամբողջ տեղեկատվությունը ոչ մի նոր բան չի ներկայացնում եւ նախկինում լրատվամիջոցներում բազմիցս հայտնվել է:
Ամենայն հավանականությամբ, ընթերցողներին այսպիսի անկեղծության հոսք տրամադրելով, նախարարը նպատակ ուներ «խեղդելու» ընթերցողին՝ տպավորություն գործել քանակով, ոչ թե որակով:
Հավանաբար, նախարարի նպատակն էր ցույց տալ, որքան լավ է նա աշխատում, իսկ թիրախը, համապատասխանաբար Ադրբեջանի իշխանություններն ու հասարակությունն են:
Չէ որ նախկինում խոսակցություններ էին գնում, որ նրանից դժգոհ են, որ չի արդարացրել հույսերը», - ասել է նա:
Պատասխանելով Ադրբեջանի կողմից սեփական դրոն ստեղծելու փորձերի մասին հարցին, փորձագետը նշել է, որ այդ թեման նույնպես նոր չէ.
«Իրականում գաղտնիք չէ, որ Ադրբեջանն ինքնուրույն դրոն չի արտադրում, այլ Իսրայելից է գնում: Ադրբեջանում միայն հավաքում են », - բացատրել է նա:
