Վրաստանում ավելի քան 120 հայկական հանրակրթական դպրոց դեռ մասնագետների կարիք ունի՝ չնայած այն հանգամանքին, որ ուսուցիչները անվճար վերապատրաստվում են Հայաստանում: Այս մասին Թբիլիսիում լրագրողների հետ զրույցում ասել է Հայ Առաքելական Ուղղափառ Սուրբ Եկեղեցու Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը` նշելով, որ Վրաստանի հայ համայնքի ներկայացուցիչների՝ ՀՀ նախագահ Սերժ Սարգսյանի հետ հանդիպման ժամանակ քննարկվել են համայնքի կրթական, տնտեսական խնդիրները:
Ըստ վերջինիս՝ Վրաստանի շատ հայեր հայրենիքում են կրթություն ստանում, սակայն մասնագետների պակասի խնդիրը չի լուծվում. խնդիրը հատկապես սուր է Ջավախքում: Խոսքը մի քանի հարյուր մասնագետի մասին է:
Հանդիպման ընթացքում քննարկվել են նաեւ մշակութային հարցեր. «Հայերը շատ հաճախ են այցելում Վրաստան, վրացական մշակույթը շատ հայերին է ծանոթ, իսկ վրաց ժողովուրդը քիչ բան գիտի Հայաստանի եւ հայկական մշակույթի մասին: Անհրաժեշտ է ակտիվացնել մշակութային կապերը, եւ այդ առումով կարեւոր է ապահովել ժամանակակից հայ գրողների ստեղծագործությունների թարգմանությունը վրացերեն: Այս հարցը պետք է լուծվի պետական մակարդակով, քանի որ ներկայումս Վրաստանում ընթերցման հանդեպ մեծ հետաքրքրություն կա», - նշել է եպիսկոպոսը:
Հայ համայնքի ներկայացուցիչները նաեւ բարձրացրել են Ջավախքում ներդրումների հարցը, քանի որ աշխատատեղերի առկայությունը կլուծի հայ բնակչության սոցիալական խնդիրը, եւ նրանք ստիպված չեն լինի մեկնել արտագնա աշխատանքների:
Վիրահայոց թեմի առաջնորդը նաեւ նշել է, որ ՀՀ նախագահին ներկայացվել է Վրաստանի հայկական եկեղեցիների եւ մշակութային ժառանգության հետ կապված իրավիճակը: