2017 թվականի հունվար-նոյեմբեր ամիսներին Հայաստանի արտաքին ապրանքաշրջանառությունը կազմել է 5,784 մլրդ դոլար՝ 2016-ի նույն ժամանակահատվածի համեմատ 26,4 տոկոսով աճելով, հաղորդում է Ազգային վիճակագրական ծառայությունը:

Ըստ վերջինիս՝ հաշվետու ժամանակահատվածում արտահանման ծավալը կազմել է  2,014 մլրդ դոլար՝ տարվա ընթացքում 23,5 տոկոսով աճելով: Ներմուծման ծավալը աճել է 24 տոկոսով՝ կազմելով 3,770 մլրդ դոլար:

Արդյունքում հունվար-հոկտեմբերին արտաքին ապրանքաշրջանառության բացասական սալդոն կազմել է 1,757 մլն դոլար՝ մեկ տարվա ընթացքում 31,8 տոկոսով խորանալով:

Համաձայն վիճակագրական տվյալների՝ հանրապետության արտաքին ապրանքաշրջանառության կառուցվածքում ԱՊՀ երկրների մասնաբաժինը կազմել է 29,9 տոկոս, իսկ հեռավոր արտասահմանյան երկրների բաժինը՝ 45,8 տոկոս:

ԱՊՀ երկրների հետ արտաքին ապրանքաշրջանառությունը տարվա ընթացքում աճել է 24,6 տոկոսով՝ մինչեւ 1,728 մլրդ, ԵՄ հետ՝ 28,7 տոկոսով՝ մինչեւ 1,406 մլրդ դոլար, հեռավոր արտասահմանյան երկրների հետ՝ 26,3 տոկոսով՝ մինչեւ 2,650 մլրդ: