Միջազգային հանրությունը կհետեւի, թե ինչպես է Իրանն արձագանքում իր քաղաքացիների ցույցերին եւ անգործ չի մնա, ինչպես եղավ 2009 թվականին երկրում տեղ գտած անկարգությունների ժամանակ: Նման նախազգուշացում է արել ՄԱԿ-ում ԱՄՆ մշտական ներկայացուցիչ Նիկի Հեյլին ամերիկյան կողմի նախաձեռնությամբ հրավիրված Անվտանգության խորհրդի նիստում, հաղորդում է ՏԱՍՍ-ը:
«2009 թվականին աշխարհը պասիվ կերպով մի կողմ էր քաշվել այն դեպքում, երբ իրանցիների հույսերը տապալվում էին իրենց կառավարության կողմից: 2018 թվականին մենք չենք լռելու: Իրանի ժողովուրդը հերթական անգամ փողոց է դուրս եկել, որպեսզի խնդրի այն, որը ոչ մի կառավարություն չի կարող օրինական հիմքերով մերժել՝ խոսքը ժողովրդի իրավունքների եւ ազատությունների մասին է»,- ասել է դիվանագետը:
Նրա խոսքով՝ եթե ՄԱԿ-ի հիմքում ընկած մարդու իրավունքները եւ այլ արժեքները «որեւէ նշանակություն ունեն», ապա համաշխարհային հանրությունը «սոսկ Իրանի ժողովրդի աղոթները չի լսի», այլ կարձագանքի դրանց: «Իրանի ռեժիմին զգուշացում՝ աշխարհը հետեւելու է, թե ինչ եք անում»,- նշել է Հեյլին։
Նա քննադատել է Իրանի իշխանություններին այն բանի համար, որ նրանք խախտում են իրենց քաղաքացիների իրավունքները, ինչպես նաեւ Թեհրանին մեղադրել է տարածաշրջանում իրավիճակը ապակայունացնելու մեջ: Ըստ ԱՄՆ դեսպանի՝ Իսլամական հանրապետության կողմից այլ երկրների գործերին միջամտելու եւ Մերձավոր Արեւելքում հակամարտություններ հրահրելու համար ծախսվող միջոցների հետեւանքով վերջին տասնամյակում միջին վիճակագրական իրանցի ընտանիքի եկամուտը կրճատվել է 15 տոկոսով:
Ամերիկացի դիվանագետը կոչ է արել բոլոր երկրներին անսալ իրանցի բնակչությանը, իսկ Թեհրանի իշխանություններին` դադարեցնել ժողովրդի ձայնը գրաքննության ենթարկելը եւ վերաբացել համացանցի հասանելիությունը:
«Ի վերջո, իրանական ժողովուրդն ինքը կորոշի սեփական ճակատագիրը, եւ կարող եք համոզված լինել, որ ԱՄՆ-ն կսատարի Իրանում բոլոր նրանց, ովքեր ցանկանում են ձեռք բերել ազատություն, ապահովել իրենց ընտանիքների բարգավաճումը եւ պաշտպանել իրենց երկրի արժանապատվությունը»,- ընդգծել է նա:
ՄԱԿ-ի Անվտանգության խորհուրդում հունվարի 5-ին արտահերթ նիստ էր հրավիրվել Իրանում տիրող իրավիճակի քննարկման համար։ Ի հեճուկս սպասելիքների՝ ոչ մի անդամ երկիր չի խանգարել այս հարցը քննարկման դնելը։
