1996 թվականին Եգիպտոսում հայտնաբերված «Հիպատիա» երկնաքարը այնպիսի հանքային միացություններ է պարունակում, որոնք գոյություն չունեն Արեւային համակարգում: Այս եզրակացությունն արվել է Հարավային Աֆրիկայի Յոհանեսբուրգի համալսարանի գիտնականների կողմից: Հետազոտության արդյունքները հրապարակվել են Science Alert-ում, փոխանցում է «ՌԻԱ Նովոստի»-ն:
««Հիպատիայի» մեծ մասը տորթի վատ խառնած խմոր է հիշեցնում... Երկնաքարը մեծ քանակությամբ հազվադեպ ածխածնի միացություններ է պարունակում, որոնք պոլիարոմատիկ ածխաջրածիններ են կոչվում: Դրանք միջաստղային փոշու հիմնական բաղադրիչներն են, որը գոյություն է ունեցել դեռ մինչեւ Արեգակնային համակարգի ձեւավորումը»,- նշում է հետազոտության հեղինակներից Յան Կրամերսը:
Գիտնականների տվյալներով՝ «Հիպատիան» առաջացել է մինչեւ Արեգակնային համակարգի ձեւավորումը: Հետազոտողները գտնում են, որ մարմինը հայտնվել է -196 աստիճանի պայմաններում: Երկնաքարը Երկիր է ընկել հավանաբար Կոյպերի գոտուց, որը Արեւից 40 անգամ ավելի հեռու է, քան մեր մոլորակը:
