Հայաստանում աջակողմյան ղեկով ավտոմեքենաների ներմուծման արգելքը կհանգեցնի ձախակողմյան ղեկովների գնի կրկնակի աճին: Նման կարծիք հունվարի 15-ին լրագրողների հետ հանդիպման ժամանակ հայտնեց «Վարորդի ընկեր» հասարակական կազմակերպության համահիմնադիր Դավիթ Պեդանյանը:
Նրա խոսքով՝ դա պայմանավորված կլինի այն հանգամանքով, որ արդեն ուժի մեջ մտած Հայաստանի Հարկային օրենսգիրքը տախատեսում է բացառիկ ներմուծում հասկացությունը, ինչն օրենսդրական մակարդակում մենաշնորհային իրավունքի ամրագրում է նշանակում: Սա իր հերթին կնվազեցնի մրցակցության մակարդակը եւ կհանգեցնի ավտոշուկայում գների բարձրացման: Ընդ որում, աջակողմյան ղեկով ավտոմեքենաների գները կնվազեն, թե կբարձրանան՝ կախված է ավտոմեքենաների ներկայիս սեփականատերերից:
Իսկ «Սպառողների խորհրդատվության կենտրոն» հասարակական կազմակերպության նախագահ Կարեն Չիլինգարյանը նշեց,որ աջակողմյան ղեկով տրանսպորտային միջոցների ներմուծման արգելքը կհանգեցնի նրան, որ հայ սպառողները նույն գնով պակաս որակյալ մեքենաներ ձեռք կբերեն:
«Դա ինքնստինքյան կհանգեցնի ավտոմեքենաների շուկայում ավելի բարձր գների, իսկ 2020 թվականից նոր փուլ է սպասվում՝ կապված ԵԱՏՄ-ի շրջանակներում երրորդ երկրներից ապրանքների ներմուծման մաքսային սակագների բարձրացման հետ»,- նշեց Չիլինգարյանը: Նա հավելեց, որ այս պահին նույն դասի աջակողմյան եւ ձախակողմյան ավտոմեքենաների գների տարբերությունը կարող է 20-ից մինչեւ 50 տոկոսի հասնել:
Հիշեցնենք, որ ՀՀ կառավարությունը արդեն իսկ հաստատել է 2018 թվականի ապրիլի 1-ից աջակողմյան ղեկով ավտոմեքենաների ներմուծման արգելքի մասին օրինագիծը:
