Բազմաթիվ աշխատանքային խմբեր աշխատում են ԵՄ ռազմավարության մշակման ուղղությամբ, եւ Բուլղարիան նույնպես զգալի ներդրում է ունեցել այս գործում: Այս մասին հունվարի 17-ին Երեւանում կառույցի պատմության մեջ այս երկրի առաջին նախագահությանը նվիրված ճեպազրույցի ժամանակ հայտարարել է Հայաստանում ԵՄ պատվիրակության ղեկավար, դեսպան Պյոտր Սվիտալսկին:
Նա հաջողություններ է մաղթել Բուլղարիային եւ նշել է, որ կոնսենսուսի ձեռքբերումը չափազանց կարեւոր տարր է ցանկացած նախագահության ընթացքում: «Երբ Բուլղարիան ԵՄ-ի կազմում էր, որոշ մարդիկ անհանգստացած էին, որ կոնֆլիկտների համար նախադրյալներ կարող են ստեղծվել, քանի որ հայտնի է, որ երբ բուլղարացիները գլխով են անում, դա նշանակում է «ոչ»: Սակայն այժմ եվրոպական ընտանիքում բոլորն արդեն սովորել են ազգային առանձնահատկություններին եւ ավանդույթներին»,- կատակել է Սվիտալսկին:
Խոսելով Հայաստանի մասին՝ ԵՄ պատվիրակության ղեկավարը հավելել է, որ ՀՀ-ն մեծ հաստատակամություն է ցուցաբերել եւ նպաստել է Արեւելյան գործընկերության իրականացմանը՝ ամրապնդելով հարաբերությունները հարեւանների հետ: Իսկ այժմ Բրյուսելն ու Երեւանը հնարավորություն ունեն ավելի վաղ ձեռք բերված պայմանավորվածությունների առավել արդյունավետ իրականացման համար: Միեւնույն ժամանակ, ինչպես նշել է Պյոտր Սվիտալսկին, Հայաստանի ղեկավարությունը ջանասիրաբար աշխատել եւ աշխատում է ԵՄ-ի հետ պայմանագրով նախատեսված մեխանիզմների իրականացման ուղղությամբ: