Հայաստանի նախագահ Սերժ Սարգսյանը կմասնակցի Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանին (հունվարի 22-26) եւ ելույթով հանդես կգա հունվարի 24-ին, հաղորդում է ԵԽԽՎ պաշտոնական կայքը:
Հաղորդագրության մեջ նշվում է, որ բացի Սերժ Սարգսյանից, ԵԽԽՎ-ի նստաշրջանում նախատեսված են նաեւ Ավստրիայի նախագահի, Դանիայի վարչապետի, Դանիայի թագաժառանգ արքայադստեր ելույթները:
Այս նստաշրջանում Վեհաժողովը նաեւ պետք է ընտրի իր նախագահին եւ Մարդու իրավունքների նոր հանձնակատարին:
ԵԽԽՎ նստաշրջանում անդրադարձ կկատարվի Ուկրաինայում պատերազմի հումանիտար բնույթի հետեւանքներին, իսրայելա-պաղեստինյան հակամարտության կարգավորմանը եւ դրանում Եվրոպայի խորհրդի դերին, նաեւ Եվրոպայում հակասեմականության, իսլամատյացության եւ այլատյացության աճին: Կքննարկվի նաեւ իրավիճակը Էստոնիայում, Հունաստանում, Հունգարիայում եւ Իռլանդիայում:
Դանիայի ԱԳ նախարարը զեկույց կներկայացնի ԵԽ գործադիր մարմին հանդիսացող Նախարարների կոմիտեի աշխատանքի մասին, որտեղ այժմ նախագահում է, նա նաեւ կպատասխանի մասնակիցների հարցերին: ԵԽ գլխավոր քարտուղարը կներկայացնի իր տարեկան զեկույցը, Եվրոպայի խորհրդի մարդու իրավունքների հանձնակատարը կներկայացնի 2017 թվականի իր գործունեության արդյունքները:
ԵԽԽՎ-ն իր վերջնական օրակարգը կհստակեցնի նստաշրջանի բացման օրը: