Սեռական անձեռնխելիության եւ սեռական ազատության դեմ ուղղված հանցագործությունների թիվը Հայաստանում զգալիորեն նվազել է:
NEWS.am-ի գրավոր հարցմանն ի պատասխան ոստիկանության լրատվական ծառայությունը տրամադրել է վերջին 5 տարիներին Քրեական օրենսգրքի 138-րդ (բռնաբարությունը), 139-րդ (սեքսուալ բնույթի բռնի գործողությունները), 140-րդ (սեռական հարաբերության կամ սեքսուալ բնույթի գործողություններին հարկադրելը), 141-րդ (սեռական հարաբերությունը տասնվեց տարին չլրացած անձի հետ կամ սեքսուալ բնույթի գործողություններ կատարելը տասնվեց տարին չլրացած անձի նկատմամբ) եւ 142-րդ (անառակաբարո գործողությունները) հոդվածների հատկանիշներով գրանցված և քննությունը ավարտված քրեական գործերով և նյութերով անցնող հանցագործությունների վերաբերյալ տեղեկատվություն: Վիճակագրությունն ուսումնասիրելիս՝ պարզ է դառնում, որ եթե օրինակ 2015թ.-ին գրանցվել էր 120 դեպք, 2017թ.-ի առաջին 11 ամիսներին՝ 88:
Այսպիսով, նախորդ տարի գրանցված 88 հանցագործություններից 62-ի դեպքում տուժողներն անչափահասներ են: Նրանցից 55-ն իգական սեռի ներկայացուցիչներ են, 26 չափահասներից 25-ն էլ են իգական սեռի: Տուժածներից 2-ն օտարերկրացիներ են: Հանցագործություններից 9-ը տեղի են ունեցել բնակարանում, 2-ը՝ տրանսպորտային միջոցում: Քննվել է ընդհանուր առմամբ 44 դեպք: Հետաքրքիր է, որ գրանցված 88 դեպքերից 18-ը՝ բռնաբարություն է, 6-ը՝ բռնաբարության փորձ, 40-ը՝ անչափահասի հետ սեռական հարաբերությունը կամ սեքսուալ բնույթի գործողություններ կատարելը, 13-ը՝ սեքսուալ բնույթի գործողություններ կատարելը: Վիճակագրությունից պարզ է դառնում, որ հիշյալ հանցագործությունների ճնշող մեծամասնության դեպքում տուժողն անչափահաս է, իգական սեռի ներկայացուցիչ: Գործերով 8-ի դեպքում տուժողն արական սեռի ներկայացուցիչ է: Նրանցից 5-ն անչափահաս է:
2016թ.-ի ընթացքում ՔՕ 138-142-րդ հոդվածների հատկանիշներով գրանցվել է 118 դեպք, 2015թ-ին՝ 120, 2014թ.-ին՝ 97, 2013թ.-ին՝ 115, իսկ 2012թ.-ին՝ 105: Գործերով ճնշող մեծամասնության դեպքում տուժողներն իգական սեռի ներկայացուցիչներ են, անչափահասներ: Արական սեռի ներկայացուցիչները համեմատաբար քիչ են, միայն 2013թ.-ին է, որ նրանց թիվը համեմատած մյուս տարիների շատ է՝ 15 տուժող, որից 7-ի նկատմամբ անառակաբարո գործողություն է կատարվել, 4-ի նկատմամբ՝ սեքսուալ բնույթի բռնի գործողություններ:
