Շատերը սպասում են, որ ապրիլի 9-ին ամեն ինչ կավարտվի, բայց դա այդպես չէ: Այդ օրը նոր քաղաքական ցիկլ կսկսվի, որը կշարունակվի մինչեւ 2022 թվականի գարնանը կայանալիք խորհրդարանական ընտրությունները: Այս մասին հունվարի 18-ին լրագրողների հետ հանդիպման ժամանակ հայտարարեց քաղաքագետ Կարեն Քոչարյանը:
Խոսելով վարչապետի եւ նախագահի պաշտոնների հավանական թեկնածուների մասին՝ քաղաքագետը նշեց, որ դա այդքան էլ կարեւոր չէ: «Որեւէ նշանակություն չունի, թե ով կստանձնի ՀՀ վարչապետի եւ նախագահի պաշտոնները. միեւնույն է նրանք կառաջարկվեն Հայաստանի Հանրապետական կուսակցության կողմից»,- ասաց Քոչարյանը՝ հավելելով, որ 2017 թվականի ապրիլին կայացած խորհրդարանական ընտրություններին հաղթեց ՀՀԿ-ն, եւ հենց նա էլ որոշումներ կկայացնի:
