Երեւանում անցած տարի հունվարի 11-ին սպանված 18-ամյա ուսանող Վահե Մուրադյանի հարազատները քաղաքացիական հայց են ներկայացրել ամբաստանյալ Կարեն Չատիկյանի դեմ:
Կենտրոն եւ Նորք-Մարաշ վարչական շրջանների ընդհանուր իրավասության դատարանում հունվարի 18-ին նախագահող դատավոր Արշակ Վարդանյանը հայտնեց, որ հայցադիմումը ստացել են տուժողի իրավահաջորդ Տիգրան Մուրադյանից:
«Տուժողը պահանջում է բռնագանձել 4 մլն դրամ՝ որպես հանցագործությամբ պատճառված վնասի փոխհատուցում»,- գրված էր հայցադիմումում:
Հայցադիմումը կքննարկվի հաջորդ դատական նիստին՝ փետրվարի 19-ին: Նշենք, որ այս գործով դատավարությունը սկսվել է 2017թ.-ի սեպտեմբերին: Դատարանում արդեն իսկ հարցաքննվել են երկու կողմի ընկերներն ու կուրսեցիները: Մնացել է դատարանում հարցաքննվի առանցքային վկա Գեւորգ Տերտերյանը:
Ըստ մեղադրական եզրակացության՝ Կարեն Չատիկյանը 2017թ. հունվարի 11-ին Վարդանանց փողոցի շենքերից մեկի բակում գտնվող բացօթյա տաղավարում տեղի ունեցած վիճաբանության ընթացքում իր մոտ եղած դանակով հարվածել է Ռաֆֆի Մարտիրոսյանին և Վահե Մուրադյանին, ինչի հետևանքով Ռ. Մարտիրոսյանի առողջությանը դիտավորությամբ պատճառել է միջին ծանրության վնաս, իսկ Վ. Մուրադյանին ապօրինաբար դիտավորությամբ զրկել կյանքից:
Կարեն Չատիկյանին մեղադրանք է առաջադրվել Քրեական օրենսգրքի 104-րդ եւ 113-րդ հոդվածների 1-ին մասերով: Նա կալանավորված է:
Նշենք, որ եւ Կարենը, եւ Վահեն Երեւանի պետական համալսարանի ուսանողներ էին: