Հայաստանի տրանսպորտի, կապի ու տեղեկատվական տեխնոլոգիաների նախարարությունից պարզաբանել են, թե ինչ է նշանակում աջակողմյա ղեկային տեղաբաշխմամբ մեքենաների շահագործման արգելքի մասին տարօրինակ ձեւակերպումը, որը հայտնվել է «Աջակողմյա ղեկային տեղաբաշխմամբ տրանսպորտային միջոցների ներմուծման ժամանակավոր արգելքի» մասին օրինագծում։
Հիշեցնենք, որ այդ օրինագիծը հաստատվել է կառավարության ՝ հունվարի 18-ի նիստի ժամանակ։ Օրինագծի տեքստում կա հղում կառավարության՝ հունվարի 11-ի որոշմանը, որի համաձայն , ապրիլի 1-ից սկսած արգելվում է աջ ղեկով մեքենաների շահագործումն ու հաշվառումը։ (Հաշվի առնելով վերը նշվածը ՀՀ կառավարության կողմից 2018 թվականի ապրիլի 1-ից արգելվել է աջակողմյան ղեկային տեղաբաշխմամբ տրանսպորտային միջոցների շահագործումը եւ հաշվառումը)։ Այս ձեւակերպումից ելնելով՝ օրինաչափ հարց է ծագում՝ սա վրիպակ է, թե՞ մտադրություն։
Մեկնաբանելով NEWS.am-ի հարցը՝ նախարարության տրանսպորտային բաժնի ղեկավարի տեղակալ Դավիդ Մելքոնյանը նշել է, որ ըստ ավելի վաղ կառավարության կայացրած որոշման, ապրիլի 1-ից արգելվում է աջակողմյա ղեկային տեղաբաշխմամբ մեքենաների գրանցումը։ Դրանից հետեւում է, որ արգելվում է ներմուծված ու չգրանցված մեքենաների շահագործումը։ Պաշտոնյան հիշեցրել է, որ դրան համապատասխան մշակվել, հաստատվել ու ԱԺ ին է ներկայացվել օրենքի նախագիծ ( վերոնշյալ օրինագիծը-խմբ․)՝ աջակողմյա ղեկային տեղաբաշխմամբ մեքենաների ներմուծման ժամանակավոր արգելքի մասին։ Մելքոնյանի կարծիքով՝ վրիպակի մասին խոսք չկա, հենց մինչեւ ապրիլի 1-ը չգրանցված մեքենաների մասին է խոսքը։
Թե ինչպես է կառավարությունը նախ կայացրել որոշում, հետո նոր դիմել ԱԺ-ին՝ օրենսդրական բազա ստեղծելու համար, առանձին հարց է։ Ընդ որում կառավարության՝ հունվարի 11-ի որոշման տեքստը երկու կայքերում էլ չկա՝ ոչ կառավարության, ոչ նախարարության։ Միաժամանակ, ուզում ենք շեշտել, որ նույնիսկ օրենքի նախագծի տեքստը պետք է բացառի երկակի մեկնաբանության հնարավորությունը, ինչն առկա է տվյալ դեպքում, քանի որ առաջարկված տարբերակը միանշանակ նշանակում է՝ ապրիլի 1-ից արգելել աջակողմյա ղեկային տեղաբաշխմամբ տրանսպորտային միջոցների շահագործումը։
Ավելի վաղ Տրանսպորտի նախարարությունն արդեն խախտել էր պայմանավորվածությունը «Աջ ղեկ» շարժման ակտիվիստների հետ։ Ըստ այդ պայմանավորվածության՝ հունվարի 12-ին պետք է կայանար առաջարկների փաթեթի քննարկում, սակայն հունվարի 11-ին կառավարության օրակարգում ներառվել է որոշման նախագիծը, որն անմիջապես ընդունվել է։
