ԵՄ-ն մտադիր է ասոցացման մասին համաձայնագիր կնքել Պաղեստինի հետ, հայտնել է Ֆրանսիայի ԱԳ նախարար Ժան Իվ Լե Դրիանը՝ ԱԳ նախարարների մակարդակով ԵՄ խորհրդի նիստի ժամանակ, փոխանցում է «Կոմերսանտ․ ռուն»։
«Մենք ուզում ենք հայտնել նախագահ Աբասին, որ ԵՄ-ն ուզում է Պաղեստինի հետ հարաբերություններում ժամանակավոր համաձայնագրից անցնել ասոցացման մասին համաձայնագրի»,- մեջբերում է պարբերականը ֆրանսիացի նախարարին։ Նրա խոսքով՝ ԵՄ-ն նաեւ մտադիր է հաստատել հանձնառությունը մերձավորարեւելյան հակամարտությունը «երկու պետությունների» սկզբունքի հիման վրա կարգավորելուն։ Պարոն Լե Դրիանի կարծիքով՝ այս սկզբունքը խաթարվել է ՝ ամերիկյան դեսպանատունը Թել Ավիվից Երուսաղեմ տեղափոխելու՝ ԱՄՆ որոշման հետեւանքով։
ԱՄՆ-ն Երուսաղեմը Իսրայելի մայրաքաղաք է ճանաչել անցած տարվա դեկտեմբերի 6-ին։ Այդ որոշումը առաջացրել է արաբական երկրների ղեկավարության բացասական արձագանքը, դրան դեմ են արտահայտվել նաեւ ԱՄՆ դաշնակիցները։ Վաշինգթոնն արգելափակել է ՄԱԿ ԱԽ բանաձեւը, որը դատապարտում է քաղաքի կարգավիճակի ճանաչումը։
