Ճապոնիայի Տոկիո, Տիբա, Կանագավա, Սայտամա պրեֆեկտուրաներում ձյան տեղումների հետեւանքով ավելի քան 250 մարդ է տուժել, առնվազն մեկը մահացել է, նշված է հրշեջ պահպանության ծառայության տվյալներում, փոխանցում է «ՌԻԱ Նովոստի»-ն:
Այսպես՝ Տիբա պրեֆեկտուրայում անցուղու վրա ձյան պատճառով մեքենա է խցանվել, վարորդին, որը փորձել է այն հրել կամ ճանապարհը ձյունից մաքրել, հարվածել է էլեկտրագնացքը:
Տոկիոյում ձյան ծածկույթը գիշերը կազմել է 23 սմ: Ձյան նման տեղումներ այստեղ գրանցվել էին 4 տարի առաջ:
Երեկոյան Տոկիոյի տանսպորտի աշխատանքում լուրջ խափանումներ են եղել: Գնացքների ուշացումների պատճառով շատերը չեն հասցրել վերջին էլեկտրագնացքին: Japan Railways East երկաթուղային ընկերությունը ստիպված էր ուղեւորներին գնացք տրամադրել գիշերելու համար:
Տիբա պրեֆեկտուրայում Նարիտա եւ Տոկիոյի Հանեդա օդանավակայաններում 337 չվերթ է հետաձգվել: Միայն Նարիտայում 9 հազար ուղեւորներ գիշերն անցկացրել են սպասասրահներում:
Չնայած երեքշաբթի առավոտյան ձյունը դադարել է տեղալ, տրանսպորտի խափանումները շարունակվում են: Որոշ դպրոցներում այս պատճառով առաջին դասաժամերը չեն անցկացվել:
