Այս օրերին շուրջ 270 մարդ լսել է դեկտեմբերի 30-ից իր գործազուրկ դառնալու լուրը: Խոսքը ՀՀ աշխատանքի եւ սոցիալական հարցերի նախարարության սոցապ պետական ծառայության վճարումների ծառայության աշխատակիցների մասին է: Նրանք երեկ հայտարարել են, որ իրենք բոլորն իշխող ՀՀԿ անդամ են, որ ստիպողաբար անդամագրվել են մի գիշերում եւ պատրաստվում են պատռել իրենց անդամատոմսերը:
Ասել են նաեւ, որ իրենք հարյուրավոր մարդիկ են «բերել» ՀՀԿ, եւ իրենց ստիպել են ընտրությունների ժամանակ ձայներ հավաքել ՀՀԿ-ի օգտին: ՀՀ սահմանադրության 28-րդ հոդվածում, սակայն, գրված է. «Մարդուն չի կարելի հարկադրել անդամագրվել որեւէ կուսակցության կամ միավորման», մինչդեռ այդպես ՀՀԿ-ն համալրել է իր շարքերը: Կուսակցության մամլո խոսնակ Էդուրադ Շարմազանովը թերթի թղթակցի հետ զրույցում ասել է. «Ես կասկածանքով եմ վերաբերվում, որովհետեւ չեմ կարծում, որ նման բռնատիրական ժամանակաշրջան է, ու մի գիշերվա մեջ իրենց ստիպելով դարձել են ՀՀԿ-ական: Եթե նման բան կա, թող մինչեւ այդ խոսեին»:
