Հայաստանում գենետիկորեն ձեւափոխված օրգանիզմների (ԳՁՕ) վերաբերյալ խորհրդարանական լսումները կարեւոր էին այն տեսակետից, որ այս հարցի քննարկման պահը հասունացել է: Նման կարծիք հունվարի 29-ին լրագրողների հետ հանդիպման ժամանակ հայտնեց կենսաբանական գիտությունների դոկտոր Ռուզաննա Սադոյանը:
Նրա խոսքով՝ Հայաստանում ԳՁՕ-ների արտադրությունը եւ տարածումը կարգավորող օրենք է պետք ընդունել, որոնք կարող են բացասաբար անդրադառնալ մարդու առողջության եւ շրջակա միջավայրի, ինչպես նաեւ գյուղատնտեսական արտադրանքի վրա: «Խորհրդարանական լսումների ժամանակ պարզ դարձավ, որ այս հարցում բոլորը միակարծիք են: Գյուղատնտեսության նախարարությունում հանձնաժողով է ստեղծվել, որում ոչ միայն գիտնականներ, այլ նաեւ բնապահպանության, առողջապահության նախարարության ներկայացուցիչներ, իրավաբաններ եւ հասարակական կազմակերպությունների անդամներ են ներառված»,- ասաց Սադոյանը:
Փորձագետը կարծում է, որ խորհրդարանական լսումներից հետո որոշակի դրական արդյունք կգրանցվի, որն ուղղված կլինի Հայաստանի եւ հայ հասարակության՝ ԳՁՕ-ների բացասական հետեւանքներից պաշտպանությանը:
Հիշեցնենք, որ հունվարի 26-ին Հայաստանի խորհրդարանում լսումներ կայացան «Գենետիկորեն ձեւափոխված օրգանիզմները. այլընտրանք, թե՞ պարտադրանք» թեմայով: