Փետրվարի 18-ին, ժամը 18.20-ին, հիվանդանոցից ոստիկանության Մաշտոցի բաժնում հաղորդում է ստացվել, որ «աջ ազդրի կտրած-ծակած վերք» ախտորոշմամբ բուժօգնության է դիմել 45-ամյա Մանաս Վ.-ն:

Ոստիկանությունից NEWS.am-ին հայտնում են, որ մեկնած օպերատիվ խմբին, ժամը 19.30-ին, Մանաս Վ.-ն հաղորդում է տվել, որ նույն օրը, ժամը 16.00-ին, Երեւանի Բաշինջաղյան փողոցի թիվ 196 հասցեի մոտ իր ծանոթ ոմն Ռուդիկ, վիճաբանության ժամանակ, դանակով հարվածել է իր աջ ազդրին:

Ոստիկանության ծառայողների ձեռնարկած միջոցառումների շնորհիվ պարզվել է, որ Ռուդիկը 1972 թ. ծնված Հովհաննես Ա.-ն է, որը ժամը 20.00-ին Բաշինջաղյան փողոցի թիվ 191 շենքի մոտից, «Օպել Օմեգա» մակնիշի ավտոմեքենայով, բերման է ենթարկվել բաժին:

Ավտոմեքենայի զննությամբ վարորդի նստելատեղի տակից հայտնաբերվել է հանցագործության գործիք դանակը:

Նշանակվել են դատատեխնիկական եւ դատաբժշկական փորձաքննություններ:

Կատարվում է քննություն: