Թեհրանը լրջորեն մտահոգված է Սիրիայում ԱՄՆ ներկայությամբ, ինչը անօրինական է համարում: Այս մասին հայտարարել է Իրանի արտգործնախարար Մոհամմադ Ջավադ Զարիֆը Ռուսաստանի արտգործնախարար Սերգեյ Լավրովի հետ հանդիպման ժամանակ, հաղորդում է ՏԱՍՍ-ը:
«Հուսով ենք, որ մենք կշարունակենք այս հարցի շուրջ երկխոսությունը, որպեսզի քաղաքական կարգավորման համար այն կարեւոր պայմանավորվածությունները, որոնք մենք (Ռուսաստան, Իրան եւ Թուրքիա) հասել ենք, ամրապնդվեն»:
Նախարարը խոստովանել է, որ սա իր 22-րդ այցն է Ռուսաստան: «Սա ցույց է տալիս Իրանի եւ Ռուսաստանի միջեւ ռազմավարական հարաբերությունների խորությունը, որոնք մինչ օրս շատ կարեւոր դեր են խաղացել մեր տարածաշրջանում անվտանգության եւ կայունության հաստատման գործում», - ասել է նա:
Բացի այդ, Իրանի արտգործնախարարը բարձր է գնահատել Պարսից ծոցի երկրների միջեւ երկխոսության գաղափարը: «Մենք հուսով ենք, որ Ռուսաստանն այդ շփումների ընթացքում կառուցողական դեր կխաղա», - ասել է նա: «Մենք նաեւ հուսով ենք, որ Եմենում իրավիճակը կարգավորելու ձեր ծրագրով մենք կկարողանանք դադարեցնել այս երկրում տեղի ունեցող հումանիտար աղետները», - ավելացրել է Զարիֆը:
