ՀՀ նախագահի թեկնածու Արմեն Սարգյանը հորդորեց «Ելք» խմբակցության ղեկավար Նիկոլ Փաշինյանին Սերժ Սարգսյանի հայտարարությունների մասին մեկնաբանություններ խնդրել միայն Սերժ Սարգսյանից։
Ես չեմ կարող այս պահին մեկնաբանել քաղաքական գործիչների մեկնաբանությունները: Այս մասին, այսօր՝ մարտի 1-ին, ԱԺ-ում իր ելույթում նշեց ՀՀ նախագահի թեկնածու Արմեն Սարգսյանը՝ պատասխանելով «Ելքո» խմբակցության պատգամավոր Նիկոլ Փաշինյանի հարցին, թե ինչպե՞ս է վերաբերում այն երեւույթին, որ Սերժ Սարգսյանը հայտարարել է՝ ինքը չի հավակնելու վարչապետի կամ նախագահի պաշտոնին, բայց պրոցեսները հենց դրան են տանում:
«Եթե ես ընտրվեմ հանրապետության նախագահ, եթե դրանից հետո ԱԺ-ում իշխող կուսակցությունը որոշի առաջադրել Սերժ Սարգսյանին եւ այդ պահին, երբ Հանրապետության այսօրվա նախագահն այստեղ կանգնած լինի, ճիշտ կլինի այդ հարցն ուղղեք իրեն, ոչ թե՝ ինձ», - նշեց նա։
Արմեն Սարգսյանը նշեց, որ եթե այդ ճանապարհով գնանք, կան հարգված երկրների ղեկավարներ, որոնք ոչ թե 2 տարին մեկ անգամ, այլ ֆեյսբուքով ու թվիթերով ամեն օր են հայտարարություններ անում. «Թե որքան է այդ հայտարարությունների քաղաքական կամ պետական արժեքը, թողնում եմ ձեզ դատելու»:
Հարցին, թե կան արդյոք ՀՀ-ում քաղբանտարկյալներ, Արմեն Սարգսյանն ասաց, որ ինքը լուրջ է վերաբերում այդ հարցին ու քաղացիական հասարակության եւ մարդու իրավունքների պաշտպանությամբ զբաղվող խմբերի հետ քննարկել է հարցը ու տարբեր կարծիքներ լսել, խնդրել իրեն փաստաթուղթ տրամադրել։
«Դեռեւս չեմ տեսել եվրոպական ինստիտուտներից փաստաթուղթ, որի վրա գրված է, որ ինչ-որ անձ քաղբանտարկյալ է։ Երբ ներկայացնեն, տեսնեմ այդ փաստաթղթերը, իմ անձնական կարծիքը կունենամ եւ իմ վերաբերմունքը ցույց կտամ, որ մեր երկրում քաղբանտարկյալներ չպետք է լինեն»:
Նշենք, որ այսօր ԱԺ-ում սկսվել է ՀՀ 4-րդ նախագահի ընտրության հարցի քննարկումը, իսկ քվեարկությունը տեղի կունենա վաղը: