Ներկայացվել են Եվրասիական տնտեսական միության (ԵԱՏՄ) միասնական կանոններով դեղամիջոցների գրանցման առաջին հայտերը: Այս մասին ԱՏՄ-ի եւ ԱՊՀ երկրների դեղագործական ֆորումի ժամանակ հայտնել են Ղազախստանի կարգավորող մարմնի ներկայացուցիչները: Բելառուսի կարգավորողները հաստատել են այդպիսի դիմումներն ընդունելու իրենց պատրաստակամությունը:
Այժմ, Միության օրենքի համաձայն, բավարար է փորձագիտական հաշվետվություն ձեռք բերել ԵԱՏՄ երկրներից մեկում, որպեսզի դրա հաստատումից հետո այլ անդամ պետություններում առանց հետագա լաբորատոր փորձաքննության դեղամիջոցի գրանցման վկայական ստանան եւ Միության ամբողջ տարածքում ազատ առեւտրի հնարավորություն ունենան:
Ընդ որում, Միության միասնական տեղեկատվական համակարգի կիրառմամբ լայնածավալ գրանցման աշխատանքները կմեկնարկեն 2018 թվականի առաջին կեսին նախատեսված գործարկումից հետո: Այս համակարգի ինտեգրացիոն հատվածն արդեն պատրաստ է, աշխատանքներ են տարվում ԵԱՏՄ-ի յուրաքանչյուր պետությունում ազգային սեգմենտների նախապատրաստման ուղղությամբ:
2021 թվականի ունվարից դեղագործական արտադրողները պարտավոր են իրենց արտադրանքը գրանցել միայն Միության պահանջներով: Մինչեւ 2025 թվականի վերջը ազգային օրենսդրության կանոններով գրանցված բոլոր դեղերը պետք է համապատասխանեն ԵԱՏՄ-ի չափանիշներին: