Տասնյոթամյա բրիտանացի Լլոյդ Գանտոնը ցմահ ազատազրկման է դատապարտվել ամերիկացի երգիչ Ջասթին Բիբերի համերգի ժամանակ հանուն «Իսլամական պետության» ահաբեկչություն կազմակերպելու փորձի համար, հայտնում է Telegraph թերթը։
Ըստ պարբերականի տվյալների՝ դեռահասը մի քանի նամակ էր գրել՝ սպառնալով հարձակում իրականացնել Ուելսի մայրաքաղաք Քարդիֆում ծրագրված համերգի ժամանակ։ Նամակներից մեկում նա իրեն անվանել է «ԻՊ զինվորը», ու ասել, որ «հարձակվելու է Քարդիֆի վրա այսօր, քանի որ Ձեր կառավարությունը ռմբակոծում է Սիրիան ու Իրաքը»։
Գանտոնի տանը կատարված խուզարկության ժամանակ ոստիկանությունը նրա դպրոցական պայուսակում հայտնաբերել է դանակ ու մուրճ, որոնք, ըստ քննության, դեռահասը մտադիր էր գործածել ամբոխի մեջ մեքենայով մխրճվելուց հետո։
Մեղադրյալը հերքում էր իր մեղավորությունը՝ հայտնելով, որ իր մոտ «հիմար հետաքրքրություն» էր առաջացել բռնության տեսարանների հանդեպ, սակայն ինքը իսկական ահաբեկչություն չէր ծրագրում։ Թերթը գրում է, որ դատավորը հայտնել է, որ չի կարող սահմանել դեռահասի ազատազրկման ու ազատ արձակման ժամկետները, քանի որ վստահ չէ, թե երբ մեղադրյալը կդադարի վտանգ ներկայացնել հասարակության համար։
«Ես վստահ եմ, որ դուք ծրագրում էիք զանգվածային սպանություններ, այլ ոչ թե մեկ մարդու սպանություն․․․ Ես չեմ կարող նախապես հասկանալ, թե երբ դուք այլեւս վտանգավոր չեք լինի»,- մեջբերել է պարբերականը դատավորի խոսքը։ Նշում են, որ ցմահ ազատազրկման դատապարտված Գանտոնը իրավունք ունի 11 տարի հետո միջնորդություն ներկայացնել վաղաժամկետ ազատ արձակման մասին։
