Մեծ Բրիտանիայի ներքին գործերի նախարար Ամբեր Ռադը հայտարարել է, որ ոստիկանության սպան, որն, ինչպես եւ նախկին գնդապետ Սերգեյ Սկրիպալը, հոսպիտալացվել էր նյարդակաթվածային նյութով թունավորումից հետո, խոսել է, հայտնել է Reuters–ը։
«Ոստիկանության պետը ինձ ասաց, որ տուժած ոստիկանը սկսել է խոսել, բայց դա չի նշանակում, որ նրա վիճակը լուրջ չէ», - ասել է Ռադը:
Նա նաեւ հրաժարվել է հրապարակել մանրամասներ այն նյութի մասին, որով թունավորվել է նախկին գնդապետ Սերգեյ Սկրիպալը, նրա դուստրը եւ ոստիկանը։
Նշենք, որ մարտի 5-ին Բրիտանիայի Սոլսբերի քաղաքում անգիտակից վիճակում հայտնաբերվել էր Ռուսաստանի գլխավոր հետախուզական վարչության նախկին գնդապետ 66-ամյա Սերգեյ Սկրիպալը եւ նրա դուստրը՝ Յուլյա Սկրիպալը։ Նրանք հոսպիտալացման պահին ծայրահեղ ծանր վիճակում են գտնվել։ Ենթադրվում է, որ նրանք թունավորվել են սինթետիկ օփիատներով։
Նշվում է նաեւ, որ Բրիտանիայի արտակարգ ծառայությունների աշխատակիցները, որոնք ժամանել էին դեպքի վայր, եւս հիվանդանոց են տեղափոխվել։ Նրանց առողջությանը վնաս է պատճառվել, սակայն ինչ է ախտորոշվել, հայտնի չէ, փոխանցում է Sky Newsը։
Հավելենք, որ Սկրիպալը դատապարտվել էր 2006 թվականին Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: