ԱՄՆ Քալիֆորնիայի նահանգի Սենատի կանոնակարգի եւ վարչական հարցերով կոմիտեն օրենսդիր ժողովի մի քանի կին ներկայացուցիչների բողոքի հետ կապված քննությունը ավարտելուց հետո տեղացի սենատոր Բոբ Հերցբերգին խորհուրդ է տվել զերծ մնալ գործընկերների հետ գրկախառնվելուց, հայտնում է Los Angeles Times պարբերականը:
«Հիմա դուք նախազգուշացվում եք, որ ձեր պահվածքը ողջունելի չէ»,- նշված է կոմիտեի նամակում: Պարբերականը հայտնում է, որ սենատորը կոմիտեից նկատողություն է ստացել:
Նահանգի Սենատը օրենսդիրի պահվածքի հետ կապված ներքին քննություն էր սկսել, երբ տեղական օրենսդիր մարմնի 3 գործող եւ նախկին կին ներկայացուցիչներ հայտարարել էին, որ նրա գրկախառնություններն անտեղի էին: Քննություն անցկացրած կոմիտեի ներկայացուցիչները պարզել են, որ մարդիկ երբեմն կարող էին իրենց անհարմար զգալ Հերցբերգի պահվածքի պատճառով, սակայն «մեծ մասամբ» դիմողներ սենատորի գրկախառնությունները բացասաբար չեն ընկալել: Դրանից զատ, քննության մասնակիցները եզրակացրել են, որ օրենսդիրի գործողությունները «սեքսուալ բնույթ» չեն ունեցել:
Քննության ընթացքում նաեւ պարզվել է, որ նախկինում տեղական Սենատը Հերցբերգին արդեն նախազգուշացրել էր, որ իր գրկախառնություններն ու հպումները «զգուշավորություն են առաջացնում»: Կոմիտեի զեկույցում նշվում է, որ օրենսդիրն այդ նախազգուշացումը լուրջ չի ընդունել եւ «չի կարողացել հասկանալ, որ այդ գրկախառնությունները ոմանց իսկապես անհարմարություն են պատճառում»:
Հերցբերգը, որն իր պահվածքի համար ստացել «գրկողը» (Huggy Bear) մականունը, ներողություն է խնդրել նրանցից, ովքեր անհարմարություն են զգացել իր գրկախառնություններից եւ հայտարարել, որ կոմիտեի եզրահանգումներին համաձայն է:
