Առնվազն 9 զբոսաշրջիկ է զոհվել, 18–ը վիրավորվել լայնամասշտաբ անտառային հրդեհի արդյունքում, որը տեղի է ունեցել Հնդկաստանի հարավում Թամիլնադ նահանգի Կուրանգանի լեռնային գոտում, հաղորդում է ANI գործակալությունը։
Զոհվածների ազգային պատկանելության մասին չի հաղորդվում։
NDTV հեռուստաալիքի փոխանցմամբ՝ անտառային հրդեհը բռնկվել է այն ժամանակ, երբ զբոսաշրջիկները վերադառնալիս են եղել Կանանց միջազգային տոնի առթիվ կազմակերպված արշավից։ Հեռուստաալիքի տվյալներով, զոհվածներն ու տուժածները տեղի բնակիչներ են եղել, սակայն պաշտոնապես չի հաստատվել այդ տեղեկությունը։
Տեղի ունեցածից կարճ ժամանակ անց Հնդկաստանի պաշտպանության նախարար Նիրմալա Սիտհարամանը հանձնարարել է գործի դնել օդուժը՝ որոնողափրկարարական աշխատանքների համար։ Ոստիկանությունում նշել են, որ վերջին շրջանում այդ տարածքներում առնվազն մի քանի հրդեհ է բռնկվել, եւ այդ տարածքներ բարձրանալուց առաջ զբոսաշրջիկները պետք է համապատասխան թույլտվություն ստանային համապատասխան մարմիններից: