Մեծ Բրիտանիան արգելափակել է ՄԱԿ Անվտանգության խորհրդում Ռուսաստանի առաջարկած հայտարարության նախագիծը՝ Սոլսբերիում ՀԳՎ նախկին գնդապետ Սերգեյ Սկրիպալի եւ նրա դստեր՝ Յուլյայի թունավորման միջադեպի հետաքննության վերաբերյալ: Այս մասին հայտնել է ՄԱԿ-ում Ռուսաստանի մշտական ներկայացուցչության ներկայացուցիչ Ֆյոդոր Ստրժիժովսկին, փոխանցում է RT-ն:
«ՄԱԿ ԱԽ մարտի 14-ի նիստում մամուլի համար Ռուսաստանի առաջարկած կարճ եւ փաստաբանական հայտարարության նախագիծը՝ ուղղված Մեծ Բրիտանիայում քիմիական միջադեպի քաղաքակիրթ հետաքննության արագ անցկացմանը ՔԶԱԿ գոյություն ունեցող ստանդարտների համաձայն, քաղաքանացված պատճառներով կոպիտ կերպով արգելափակվել է այդ երկրի ներկայացուցիչների կողմից»,- հստակեցրել է նա:
Ստրժիժովսկին հավելել է, որ Մեծ Բրիտանիայի առաջարկած փաստաթղթի ուղղումները իմաստը խեղաթյուրում էին:
Մարտի 12-ին Մեծ Բրիտանիայի վարչապետ Թերեզա Մեյը հայտարարել է Սոլսբերիի միջադեպին ռուսական կողմի մասնակցության «մեծ հավանականության» մասին:
Հետագայում Սպիտակ տունը հայտնել է, որ համաձայն է Մեծ Բրիտանիայի դիրքորոշմանը եւ Ռուսաստանին պատասխանատու են համարում Սկրիպալի եւ նրա դստեր թունավորման միջադեպի համար:
Կրեմլից հայտարարել են, որ ռուսական կողմը միջադեպի հետ կապ չունի, ինչպես նաեւ չի ընդունի մերկապարանոց մեղադրանքներն ու վերջնագրերը: