Հայաստանը պետք է հետեւի , որպեսզի  «Երեւանի ու Զանգեզուրի վերադարձի» մասին Ադրբեջանի նախագահ Իլհամ Ալիեւի հայտարարությունները  արժանանան միջազգային հասարակության պատշաճ արձագանքին։ Այս մասին մարտի 15-ին լրագրողների հետ զրույցի ժամանակ ասել է Հայաստանի փոխարտգործնախարար Կարեն Նազարյանը ԵՄ «Արեւելյան գործընկերության» «Ժողովրդավարություն, արդյունավետ կառավարում ու կայուն զարգացում» թեմատիկ հարթակի «Պետական կառավարման բարեփոխումները» պանելի 14-րդ նստաշրջանի շրջանակում։ Նա նկատել է, որ պաշտոնական Երեւանը, փաստորեն, արձագանքել է Ադրբեջանի նախագահի նախընտրական արտահայտություններին։

Այն հարցին, թե ինչու ՀԱՊԿ-ը չի հայտնել իր դիրքորոշումը Ալիեւի հայտարարությունների վերաբերյալ, Նազարյանը պատասխանել է․ «Մենք աշխատում ենք այդ ուղղությամբ ՀԱՊԿ-ի ու մյուս միջազգային կառույցների հետ»։

Հիշեցնենք, որ Իլհամ Ալիեւը «Նոր Ադրբեջան» իշխող կուսակցության համագումարի ժամանակ իր ելույթում հայտնել է , որ երկրի ժողովրդի ու քաղաքական վերնախավի նոր ռազմավարական նպատակն է Հայաստանի մայրաքաղաք Երեւանի գրավումը, որը նա անվանել է «պատմական ադրբեջանական տարածք»։