Կա լուրջ մտավախություն, որ եղել են պետական մարմինների աշխատողների կողմնից իրենց պաշտոնական լիազորության չարաշահման դեպքեր ընտրությունների շրջանում։ Այս մասին մարտի 15-ին՝ ԱԺ Պետական-իրավական եւ մարդու իրավունքների պաշտպանության հարցերի մշտական հանձնաժողովում ««Հայաստանի Հանրապետության ընտրական օրենսգիրք» սահմանադրական օրենքում փոփոխություններ եւ լրացումներ կատարելու մասին» նախագծի քննարկման ժամանակ հայտարարել է արդարադատության փոխնախարար Արթուր Հովհաննիսյանը՝ պատասխանելով «Ելք» դաշինքի պատգամավոր Արտակ Զեյնալյանի այն հարցին, թե ինչով է պայմանավորված ուսուցիչների, բուժաշխատողների եւ պետական մարմինների աշխատողների նկատմամբ ընտրական քարոզչության համար վարչական պատասխանատվության փոփոխությունը։
Պաշտոնյան նշել է, որ նման փաստեր իր տրամադրության տակ չկան, բայց կա մտավախություն այս առումով. « Միջազգային դիտորդները եւս այդպիսի մտավախություն են հայտնել։ Հենց այդ պատճառով էլ մենք առաջարկել ենք այդ օրենսդրական փոփոխությունները»,–նշել է Հովհաննիսյանը։
Ծառուկյան խմբակցության պատգամավոր Գեւորգ Պետրոսյանն էլ, իր հերթին, պահանջել էր ընդհանրապես արգելել մանկավարժներին ու բուժաշխատողներին նախընտրական քարոզչությամբ զբաղվել, ինչպես հատուկ ծառայողների դեպքում է: Նրա կարծիքով, նրանք գործիք են դառնում այս կամ այն կուսակցության ձեռքում, որոնք օգտագործում են ուսուցիչներին եւ ուսումնական հաստատության ներսում եւ դրսում։
Նախագիծն առաջին ընթերցման ներկայացնելու համար քվեարկությանը «Ծառուկյան» խմբակցության 4 անդամները ձեռնպահ քվեարկեցին:
