Երեւանի «Հաղթանակի» կամրջից քաղաքացու ինքնասպանության փորձը կանխվել է: Այս մասին NEWS.am-ին հայտնեցին Արտակարգ իրավիճակների նախարարությունից:
Քաղաքացին տեղափոխվել է ոստիկանություն:
Հիշեցնենք, որ մարտի 16-ին վաղ առավոտյան ԱԻՆ ահազանգ էր ստացվել, որ քաղաքացին անցել է Երեւան քաղաքի «Հաղթանակի» կամրջի արգելապատնեշը եւ սպառնում է ցած նետվել: Shamshyan.com-ի փոխանցմամբ, Հրաչ անունով տղամարդը պահանջում է, որ իրեն այցելեն պատգամավորներ Գագիկ Ծառուկյանը, Սամվել Ալեքսանյանը կամ Երեւանի քաղաքապետ Տարոն Մարգարյանը:
Նա նախկինում նույնպես մեկ անգամ փորձել է նույն քայլին դիմել, սակայն այն ժամանակ ոստիկաններն ու քննիչները կարողացել էին նրան համոզել՝ չդիմել այդ քայլին: Պատճառը քրեական գործն է, որով նրան սպառնում է 3,5 տարվա ազատազրկում:
Հրաչի կինը «Հայկական ժամանակ»-ին հայտնել է, որ ամուսինը մեկ տարի առաջ գողություն է կատարել՝ քաղաքացու պայուսակից գողացել է մոտ մեկ միլիոն դրամ, ապա տուժողին փոխհատուցել է վնասը: Նախաքննությունն ավարտվել է, գործը մեղադրական եզրակացությամբ ուղարկվել է նախկին Ավան եւ Նոր Նորք վարչական շրջանների ընդհանուր իրավասության դատարան:
Քաղաքացին ասում է, որ չի ուզում դատվել. «Ուզում եմ բենզինը լցնեմ վրաս, վառեմ, իմ պաշտպանից հրաժարվել եմ, ես ինձ կարամ պաշտպանեմ»- ասել է ինքնասպանության փորձ անող տղամարդը: Նրա կինն արտասվելով ասել է, որ ամուսնուն խաբել են, ասել են չենք դատի, բայց հիմա դատում են: Նրանք սոցիալապես անապահով են, ունեն մեկ տարեկան երեխա: