Բրիտանիան «չափազանց հավանական» է համարում, որ Սոլսբերիում ՀԳՎ նախկին գնդապետ Սերգեյ Սկրիպալին նյարդակաթվածահարող նյութով թունավորելը թույլատրել է անձամբ Ռուսաստանի նախագահ Վլադիմիր Պուտինը, հայտարարել է Մեծ Բրիտանիայի ԱԳ նախարար Բորիս Ջոնսոնը, փոխանցում է BBC-ի ռուսական ծառայությունը:
«Մենք ռուսների դեմ ոչ մի բան չունենք: Այն, ինչ տեղի է ունեցել ռուսատյացության չի հանգեցնում: Մեր պահանջներն ուղղված են Պուտինին եւ Կրեմլին, ինչպես նաեւ նրա որոշմանը՝ Բրիտանիայի տարածքում, Եվրոպայի տարածքում նյարդակաթվածահարող թույնի կիրառում, Երկրորդ աշխարհամարտի տարիներից ի վեր առաջին անգամ»,- ասել է Ջոնսոնը:
Գերմանիայի կառավարության ներկայացուցիչ Շթեֆեն Զայբերթը Ջոնսոնի հետ գրեթե միաժամանակ հայտարարել է, որ իր երկիրը բրիտանական վարկածին «ճշմարտանման այլընտրանք չի տեսնում» այն մասին, որ Սոլսբերիում Սկրիպալի թունավորման հետեւում Ռուսաստանն է կանգնած:
«Այն, ինչ տեղի է ունեցել՝ ԽՍՀՄ-ում մշակված խմբի ռազմական նյարդակաթվածահարող նյութի կիրառում, չափազանց լուրջ, նողկալի երեւույթ է»,- ասել է Զայբերթը:
«Կանցլեր Անգելա Մերկելի եւ կառավարության համար շատ կարեւոր էր հստակ ցույց տալ, որ այս հարցում մենք Բրիտանիայի կողքին ենք»,- հավելել է նա:
Բրիտանիան Գերմանիային չէր դիմել քննության հարցում օգնության համար, սակայն, Զայբերթի խոսքով, Գերմանիան պատրաստ է օգնություն ցուցաբերել: