ԱՄՆ այցի առաջին օրերին հանդիպումներ են անցկացվել հայկական Սփյուռքի ներկայացուցիչների եւ «Կարնեգի» հիմնադրամի անդամների հետ: Այս մասին մարտի 19-ին ԱԺ-ում կայացած մամուլի ասուլիսի ժամանակ, որը նվիրված էր Ամերիկայի Միացյալ Նահանգներ Հայաստան-ԱՄՆ բարեկամության խորհրդարանական խմբի այցին, ասաց ԱԺ փոխխոսնակ, հայկական պատվիրակության ղեկավար Արփինե Հովհաննիսյանը:
Նրա խոսքով՝ քննարկվել են նաեւ Լեռնային Ղարաբաղի հակամարտության կարգավորման, հայ-թուրքական արձանագրությունների հարցերը, ինչպես նաեւ Հայաստանի եւ ԵՄ-ի միջեւ շրջանակային համաձայնագիրը:
«Մարտի 7-ին բավականին հագեցած օրակարգ էր՝ պայմանավորված այն հանգամանքով, որ այդ օրը հանդիպումներ են եղել ինչպես երկկողմ ձեւաչափով, այնպես էլ առանձին հանդիպումներ տարբեր կազմակերպությունների եւ կառույցների ներկայացուցիչների հետ»,- պարզաբանեց Հովհաննիսյանը:
ԱԺ փոխխոսնակը, մասնավորապես, նշեց, որ ինքը հանդիպել է USID-ի ներկայացուցիչների հետ: Այդ հանդիպման ընթացքում քննարկվել են ՏՏ ոլորտում երկկողմ համագործակցության, առեւտրի, էներգետիկայի զարգացման հնարավորությունները եւ այլն: Դրանից բացի, հանդիպում են ունեցել Հայաստան-ԱՄՆ բարեկամության խմբերի անդամները, ինչպես նաեւ ԱՄՆ Դեմոկրատական կուսակցության ղեկավար Թոմաս Պերեսի հետ:
Նրա խոսքով՝ հայկական պատվիրակության անդամները հանդիպել են ամերիկացի խորհրդարանականների հետ: Հանդիպման ընթացքում քննարկել են 2 երկրների խորհրդարանների համագործակցության հնարավորության հարցերը:
«Մարտի 8-ից 9-ը հանդիպումներ են անցկացրել ԱՄՆ Պետքարտուղարությունում, որտեղ քննարկել են կոռուպցիայի դեմ պայքարի Հայաստանի քայլերը, ինչպես նաեւ Լեռնային Ղարաբաղի հակամարտության կարգավորման հարցերը»,- հայտարարեց հայկական պատվիրակության ղեկավարը:
Ըստ որում՝ ինչպես նշեց Արփինե Հովհաննիսյանը, նույն օրերին հանդիպումներ են անցացրել Հելսինկյան ասամբլեայում, հասարակական կազմակերպությունների ներկայացուցիչների եւ Նյու Յորքի հայ համայնքի անդամների հետ: