«Ելք դաշինքը չի բացառում Երեւանում զանգվածային ակցիաների անցկացումը։ Այդ մասին այսօր՝ մարտի 19-ին «Ելք» խմբակցության նիստից հետո հայտնել է խմբակցության ղեկավար Նիկոլ Փաշինյանը։

Խմբակցության ղեկավարը հայտնել է, թե «Քաղաքացիական պայմանագիր» կուսակցությունը վարչության նիստ է գումարելու եւ քննարկելու է Սերժ Սարգսյանի վարչապետության դեմ պայքարի ուղիները։

«Որոշել ենք, որ կուսակցություններից յուրաքանչյուրը կարող է ունենալ պատկերացումներ եւ որոշումներ, որոնք հարյուր տոկոսով չեն համընկնում գործընկերների որոշումների հետ, եւ կարող են իրականացնել իրենց որոշումները։ «Ելքը» կշարունակի գործել գործել խորհրդարանական հարթակում։ Դաշինքային ֆորմատով որոշումները խոչընդոտ չէ, որ կուսակցություններն առանձին որոշումներ կայացնեն»,- ասել է Փաշինյանը։

Նա նշել է, որ դաշինքում որոշում չկա ապրիլի 1-ին եւ 3-ին Ազատության հրապարակում հանրահավաքների վերաբերյալ։ Նա հայտնել է, թե ՔՊ կուսակցությունը ներկայացրելէ  իր ճանապարհային քարտեզը։ «Երեք կուսակցությունները ունեն իրենց մոտեցումները, կան համընկնումներ, կան տարբերություններ, որոնք կարող են լինել սկզբունքային»,- ասել է Փաշինյանը՝ նկատելով, որ գործընկերները ներկայացրել են գործողությունների իրենց ծրագիրը. «Մենք եկել ենք հետեւյալ ըմբռնմանը։ Քանի որ չունենք գործողությունների հարյուրտոկոսանոց համընկնում, ամեն կուսակցություն ինքն է որոշելու իր անելիքը։ Այսօրվա քննարկումների մեջ փողոց դուրս գալու տարբերակը ներկա է, ուղղակի տարբերությունները վերաբերում են դրա մոտեցումներին»,- նշել է Փաշինյանը։

Նա նշել է, թե դաշինքում շարունակվում է նորմալ աշխատանքային պրոցեսը։