Նախկին գլխավոր դատախազ, այժմ ԱԺ պետաիրավական եւ մարդու իրավունքների պաշտպանության հարցերի հանձնաժողովի նախագահ Գեւորգ Կոստանյանը ստահոդ հայտարարություն է արել՝ նշելով, որ 2008 թվականի փետրվարի 23-ի 0038 գաղտնի հրամանը ստորագրվել է ՀՀ սահմանների պաշտպանությունն ուժեղացնելու համար: Այս մասին, այսօր՝ մարտի 20-ին, ԱԺ-ում 2008 թվականի մարտի 1-2-ի իրադարձությունների վերաբերյալ ԱԺ հայտարարության նախագծի քննարկման ժամանակ նշեց նախագծի հեղինակ «Ելք» խմբակցության ղեկավար Նիկոլ Փաշինյանը:
Նրա խոսքով, Գեւորգ Կոստանյանը փորձեց տպավորություն ստեղծել, որ այս հրամանը ստորագրվել է ՀՀ սահմանների պաշտպանությունն ուժեղացնելու համար: Սա նույնպես ստահոդ հայտարարություն է, որովհետեւ այդ հրամանով ձեւավորվել է Երեւանի կայազոր եւ Երեւանի կայազորի պետ է նշանակվել Պաշտպանության նախարարի տեղակալ Յուրի Խաչատուրովը. Նրա համար ձեւավորվել է աշխատակազմ, այդ աշխատակազմում ներգրավվել են ՊՆ-ի բարձարստիճան պաշտոնյաներ եւ հետագայում այդ կայազորի գործառույթը եղել է ՀՀ սահմաններից, շփման գծից զինտեխնիկա եւ զինվորներ տեղափոխելը Երեւանի կենտրոն, հետագայում ինչպես գիտեք ՀՀ քաղաքացիներին գնդակահարելու եւ նրանց արդարացի բողոքը ճնշելու համար»,-հայտարարեց Փաշինյանը:
Նա անդրադարձավ նաեւ ՀՀ գլխավոր դատախազության եւ իշխանության ներկայացուցիչների պնդումներին, որ 2008-ի մարտի 1-ի սպանությունների գործով նախաքննությունը շարունակվում է եւ կատարվում են քննչական գործողություններ:
«Ես մարտահրավեր եմ նետում այս հայտարարությանը, սուտ է, ոչ մի նախաքննություն էլ չի կատարվում, մարտի 1-ի սպանությունների բացահայտման ուղղությամբ ոչ մի գործողություն էլ չի կատարվում: Եթե կարող են, թող ապացուցեն հակառակը»,-նշեց Փաշինյանը:
Ինչ վերաբերում է մարտի 1-ի 10 զոհերի հարազատներին փոխհատուցում տալու խնդրին, Նիկոլ Փաշինյանն ասաց. «Գեւորգ Կոստանյանը ԱԺ հանձնաժողովի նիստում հայտարարեց, որ ՀՀ օրենսդրությունը թույլ է տալիս, որ զոհերի հարազատները ստանան փոխհատուցում: Ես կոչ եմ արել, որ նա կոնկրետ բարձրաձայնի, թե ինչպես են նրանք ստանալու փոխհատուցում: Ես չեմ ուզում խորանալ եւ ասել, թե օրենսդրական ինչ դրույթ նկատի ունի: Թող ինքը բարձրաձայնի, թե այդ ինչպես պետք է գործող օրենսդրության պայմաններում մարտի 1-ի զոհերի հարազատներն ստանան փոխհատուցում»:
Ազգային ժողովի պետաիրավական հանձնաժողովը փետրվարի 21-ին բացասական եզրակացություն է տվել 2008 թվականի մարտի 1-2-ի իրադարձությունների վերաբերյալ Ազգային ժողովի հայտարարություն ընդունելու «Ելք»-ի առաջարկին:
Հիշեցնենք, որ 2008 թվականի մարտի 1-ին իշխանությունը ուժ կիրառեց Երեւանի կենտրոնում ցույց անող ընդդիմության նկատմամբ, զոհվեց 8 ցուցարար եւ ներքին զորքերի 2 զինծառայող։ Մարդկանց զոհվելու համար ոչ ոք այդպես էլ պատասխանատվություն չկրեց։