Ճապոնական Կիրիսիմա լեռնաշղթայի ակտիվ Սիմմոե հրաբխում մի շարք ժայթքումներ են գրանցվել: Հրաբխի խառնարանի վերեւում 3.2 հազար մետր բարձրությամբ ծխի ու մոխրի սյուն է բարձրանում, հայտնում է «ՌԻԱ Նովոստի»-ն՝ վկայակոչելով երկրի գլխավոր օդերեւութաբանական վարչությունը:
Տեղական ժամանակով ժամը 07.3-ից սկսած օդերեւութաբանները «պայթուցիկ բնույթի» մի քանի ժայթքում են արձանագրել: Օրվա ընթացքում խառնարանից 800 մետր հեռավորության վրա խոշոր քարերի արտանետումներ են գրանցվել: Մասնագետները շարունակում են հետեւել հրաբխին:
NHK-ն հեռուստաընկերությունը տեղեկացրել է Միյակոնոձե բնակավայրում հրաբխային մոխրի արտանետման մասին, որը հրաբխից 10 կմ հեռավորության վրա է գտնվում:
Տարածաշրջանում հինգ հնարավոր վտանգի աստիճաններից առկա է երրորդը, ինչը լեռանը մոտենալու կամ բարձրանալու արգելք է ենթադրում: Մասնագետները կոչ են անում զգուշավորություն դրսեւորել հրաբխից երկու կիլոմետր շառավիղով, քանի որ հրաբխային քարերի արտանետումներ են հնարավոր:
