Համաշխարհային բանկի եւ Կառավարության միջեւ կնքված վարկային համաձայնագրի շրջանակներում սկիզբ է դրվել` առայժմ, Արարատի, Կոտայքի, Լոռու, Սյունիքի, Վայոց Ձորի, Շիրակի մարզերում, իրականացնելու Հարավային միջանցք տուրիզմի զարգացման ռազմավարության եւ տեղական տնտեսության եւ ենթակառուցվածքների զարգացման ծրագիրը, որը կնպաստի պատմամշակութային, հոգեւոր եւ ճարտարապետական հուշարձանների շրջակայքում զբոսաշրջային գոտիների եւ սպասարկման կառույցների ստեղծմանը, տարածքային ենթակառուցվածքների բարելավմանն ու զարգացմանը:
Հայաստանի տարածքային զարգացման հիմնադրամից NEWS.am-ին հայտնում են, որ մասնավորապես, Գառնիում նախատեսվում է «Քարերի սիմֆոնիա» բնական հուշարձանին հարող տարածքի բարեկարգում եւ դեպի հուշարձան տանող ճանապարհի վերակառուցում, Գյումրիում` «Կումայրի» պատմամշակութային արգելոցային գոտու բարեկարգում, Սյունիքում` «Զորաց քարեր» բնական հուշարձանին հարող տարածքում տուրիստական կենտրոնի կառուցում, դեպի Տաթեւ վանական համալիր տանող ճանապարհի վերակառուցում, իսկ Արարատում` Խոր Վիրապ վանական համալիրին հարող տարածքում տուրիստական կենտրոնի կառուցում:
Ասիական Զարգացման Բանկի ֆինանսական աջակցությամբ նախատեսվում է կյանքի կոչել «Երկրորդային քաղաքներում` որպես աճի բեւեռ, առաջնահերթ հիմնախնդիրների լուծման ծրագիրը», մասնավորապես Վանաձորում, Ծաղկաձորում, Սեւանում, Ջերմուկում /այստեղ ներառված է նաեւ պետբյուջեից ֆինանսավորում/ եւ այլն, համաձայն որի իրականություն կդառնա քաղաքային միջավայրի, զբոսաշրջային եւ հանգստյան վայրերի բարեկարգման, ճանապարհների վերականգնման, պատմամշակութային կառույցների պահպանման եւ բարելավման գործընթացը:
